Nuummi utoqqaat illuanni Ippiarsummi akiuussutissiineq ataasinngornermi ullaap-tungaani aallartinneqarpoq. Tassani najugaqartut sulisullu peqqinnissaqarfimmi sulisunit coronamut akiuussutissamik kapineqarput.

Peqqinnissaqarfimmi sulisut akiuussutissamik kapitinnissaat nalunaaqutaq ataasinngortoq tullinnguupput.

Taakku Dronning Ingridiup Napparsimmavissuani kapineqarput, tassani sulisut 90-it missaanniittut ataasinngornerup ingerlanerani allallu 90-it marlunngornermi kapitinnissaat pilersaarutaavoq.

Kapitittussani Hanne Rex siulliuvoq.

Tassuma coronamut akiuussutisserneqarnissani qilanaarisimavaa.

- Qilanaarinikuugakku, eqqarsarlunga inuiaqatigut ikiorsinnaagutsigit kapitissatsinnut qilanaarnikuuvunga.

- Allaanerunngilaq allaniit kapitittarneq, ajunngilaq. Annernanngilaq.

Nakorsaq: Ulloq pingaaruteqartoq

Nakorsaq Nick Duelund akiuussutissamik aamma kapineqarpoq. Taassumalu ulloq pingaaruteqarsoraa.

- Isumaqarpunga pingaaruteqartorujussuusoq, ingammik nunatsinnut innuttaasunullu. Imaakkami nunarput inukittunnguugaluarluni ungasittorujussuarmik najugaqarrakkatta. Taamaattumik coronartoqaleraluarpat navianarsinnaagami nunaqarfimmut illoqarfimmullu. Taamammat akiuussutissaqalernissarput pingaartupilussuuvoq.

 Peqqinnissaqarfimmi sulisut akiuussutissamik maanna kapineqarnerat aamma pitsaasoraa.

- Maani Dronning Ingdriup napparsimavissuani sulisooriaratta taava imannak isumaqarpoq, sinerissami tamaanga unikkiartortarput misissortikkiartorlutillu. Taamaammat pingaaruteqartorujussuuvoq maani ingerlanneqarnissaa,

- Napparsimaleraluarutta amerlasuulluta coronarratilerluta, kiap taava napparsimasut paarissavaat. Taamaammat pingaartupilussuuvoq uagut aamma massakkut kapitikkatta akiuussutissamut.

Peqqinnissaqarfimmi sulisut akiuussutissamik kapineqarnissamut eqimattani toqqarneqartut tassaapput sulinerminni napparsimasunut attaveqangaatsiartartut.