Digitalinngorsaaneq Norami sammineqalersoq

Ataatsimeersuarnerlu - soorunami - digitalimik ingerlanneqassaaq.

Tassa ataatsimeersuarneq tamaat digitalikkut toqqaannartumik aallakaatinneqassaaq, ataatsimeersuaqataasut nunani assigiinngitsuneersut toqqaannartumik oqaloqatigiillutillu allaqatigiissinnaassallutik.

- Digitalinngorsaalluni ineriartortitsinerup nassartarisaanik nunat atlantikup avannaamiut sineriallit inuussutissarsiornikkut periarfissaat nutaat pingaarnertut sammineqassaapput, Norap pisortaa, Lars Thostrup, oqarpoq, avinngarusimanerpaallu nioqqutissanik kiffartuussinernillu nunarsuarmi niuerfimmut neqerooruteqarsinnaanerat aamma ilanngullugu oqaatigalugu.

Ungasianit atuartitsineq ungasianillu nakorsiartitsineq periarfissaapput ullumikkut ilisimaneqareersut, periarfissalli ilisimaneqarpianngitsut internettip attaviit sukkanerusut akikinnerusullu Noramut ilaasortat nunaqarfiini illoqarfiinilu avinngarusimanerusuni atorneqaleriartornerat ilutigalugu aamma takussaalerumaarput, Norap pisortaa allappoq, Norallu ataatsimeersuartitsinissaata digitalimik ingerlanneqarnissaa qilanaaralugu aamma oqaatigalugu.

- Nunani atlantikup avannaaniittuni angalaneq annertuumik piffissatornartoq akisoorlu nunat akimorlugit suleqatigiinnissamut aporfiunerpaavoq. Taamaammat ataatsimeersuarnerit digitalimik ingerlanneqartalernissaat Noramut iluaqutaalluassaaq, Lars Thostrup oqarpoq.

Issittoq Digitaliusoq pillugu ataatsimeersuarneq oktobarimi novembarimilu ingerlanneqassaaq.