Dieselip aalaa sunniuteqarnerluttarpoq
Ilisimatusartut naapertorlugit pujoralaap mingutsitsinera silaannarmut uumasunullu sunniuteqarnerluttarpoq.
Terissat ilisimatusarnermi matumani misiliutigineqarsimapput. Silaannarmut mingutsinneqarsimasumut terissat ilaat inissinneqarput, terissallu allat silaannarmut minguitsumut.
Timmissat nujuartat assigiinngitsut marluk piaraat siusinnerusukkut ilisimatusarfigineqarsimapput, piaqqat taakku ilaat sisaliorfiup qanittuaniitinneqarput allallu suliffissuaqarfiunngitsumut, tassa mingutsinneqanngitsumut, inissinneqarlutik.
Terissat timmissallu nujuartat ilisimatusarfigineqarnerisa inerneri assigiinngissuteqanngitsut maanna paasineqarpoq.
Dieselip aalaa ilisimatusartut misissugaat sisaliorfinneersuuvoq, maannali naatsorsorneqarsinnaanngorpoq, pujoralak biilinit pinngortartoq inunnut aamma taamatorluinnaq sunniuttartoq. Taama isumaqarpoq ilisimatooq, Steffen Loft, Inuiaat peqqissuunissaannut ilisimatusarfimmi, Københavns Universitetimeersoq.
Inuup sananeqaataanut ilisarnaatitut takussutissat dieselip aalaanit katattussaajunnaarlugit allanngortinneqartarput. Tamatuma ersersippaa allannguutit tamakku kingornunneqarsinnaasut, Steffen Loft oqarpoq. Timilli kingornussai tamakku inummut qanoq kinguneqassanersut ilisimatuut oqaatigisinnaanngikkallarpaat.
