Diamantinik nassaartut

Aatsitassarsioqatigiiffik mikisunnguaq, Avannaa Exploration misissueqqissaarnermik suliaqartuusoq, Ilulissat eqqaanni diamantisiorlutik siorna aallartipput.

Aatsitassanik pisortaqarfimmi atorfilik John Telling oqaluttuarpoq, diamantit nassaat soqutiginaateqarluartut:

- Nassaarfigisaminni qeqertaarannguami Qeqertaa-ni Ataa-ta nalaaniittumi diamanterpaalunnik nassaarsimapput.

Nassaarisaat amerlanerit 0,5 mm-init minnerupput, mikrodiamantinik taaneqartartut. Kisianni taakkunannga qulit 0,5 mm-isut angissuseqarput, makrodiamantimillu taaneqartarlutik, ataaserlu 1mm-isut angitigaaq.

Diamantiaqqat tamakkua industridiamantinik taaneqartarput, qillarissaatitut imaluunniit manngersaatitut atorneqartarlutik.

Tamatuma eqqaata misissuiffigilluarneratigut, annertunerusumik nassaartoqarsinnaanera ilimagineqarsinnaavoq.

Tamatumanili aningaasarsiornerup qanoq inissisimanera apeqqutaassaaq, aamma nunarsuatsinni aningaasarsiornikkut ajornartorsiorneq sunniuteqassanersoq apeqqutaassaaq.

Nassaarineqartulli ilippanaateqarmata, aningaasaliisussanik nassaarniarnissaq ajornarnavianngilaq.

Aatsitassarsiornermut pisortaqarfimmi atorfilik, John Telling taama oqarpoq.