DF: Sulianut angisuunut inatsit utaqqisilaartigu
-Neriuutigaara Aleqa Hammondip qineqqusaarnermi neriorsuutigisani piviusunngortissagaa, tassa sulianut angisuunut inatsisip nalilersuiffigeqqinneqaqqissasoq. Tamannami tamatsinnut pisariaqartumik anersaartorfissaqartitsissaaq, tuaviuunneqarlunilu aasaru suliarineqartariaarulluni, Dansk Folkepartimi Kalaallit Nunaat pillugu oqaaseqartartoq Søren Espersen oqarpoq.
Suliniutinut angisuunut inatsisissap suliarineqarnissaata kinguaattoornera Danskit, Norskit Svenskillu inuussutissarsiutinik ingerlatsisuisa Kalaallit Nunaanni aatsitassasrsiulernissaminnut piareersarfissatut atorsinnaassagaat, Søren Espersen isumaqarpoq taassuma Siumut Royaltiesinik piumasaqarnera isumaqatigaa.
Qinersineq sioqqullugu Danskit naalakkersuisui nunanut allamiunut tunngasumik inatsimmut allannguutissatut siunnersuummik suliaqaraluarput, Allannguut sulianut angisuunut inatsisimmut pingaaruteqartoq, taamatulli inatsimmut allannguutissatut suliaqarneq qineqqusaarnerup nalaani unitsikkallarneqarpoq.
Qinersisoqareerneranilu naatsorsuutigineqalerpoq, sulianut angisuunut inatsit nalilersuiffigineqassasoq.
-Tassami isumaqataanikuunngillat, Siumut inatsimmut taaseqataannginneranik kinguneqartumik, naatsorsuutigaaralu inatsit inatsisartuni suliareqqinneqassasoq, Kalaallit Nunaannilu nalilersueqqittariaqarput allannguuteqassanersoq, tamannalu Folketingemi inatsimmik suliaqarnermut kinguaattoornermik kinguneqassaaq, Flemming Møller-Mortensen, Socialdemokratit Kalaallit Nunaat pillugu oqaaseqartartuat oqarpoq.
Qinersinerup inernera Folketingemi sulianut angisuunut inatsisissap suliarineqarneranut qanoq sunniuteqaratarsinnaanersoq, Statsministerip kissaatiginngilaa maanna nalilersussallugu.
-Kalaallit Nunaani tamanna aalajangerneqartariaqarpoq. Maanna qinersisoqareerpoq nutaanillu naalakkersuisoqartussanngorpoq, taakkualu kikkuussanersut suli ilisimanngilarput, naalakkersuisunngortussallu qanoq siunertaqassanersut takoqqaartariaqarparput, Helle Thorning Schmidt oqarpoq
Danmarkimi partiit talerperliuniat kissaatiginikuugaluarpaat Naalagaaffik aatsitassarsiornermik ingerlatsivimmik pilersitsissasoq, tamannali Socialdemokraatit Kalaallit Nunaat pillugu oqaaseqartartumit isumaqatiginnginneqartuarsinnarpoq
