DF: Ministeriuneq Kalaallit Nunaat pillugu isumasiorneqassaaq

Aggersaasoq tassaavoq Søren Espersen Dansk Folkepartimeersoq.  Taassuma Namminersorlutik Oqartussat Kalaallit Nunaata pisortatigoortumik Washingtonimi sinniisuutitaqarfimmik ammaanissamik pilersaaruteqarnerat ernumanartoqartippaa.

- Kalaallit Nunaata Danmarkimi sinniisuutitaqarfiani pisortap tullersortaata Adam Wormip Jyllands-Postenimut ullumi oqaatigisai naapertorlugit, sinniisuutitaqarfiliornikkut niueqatigiinneq nukittorsarniarneqaannarani aamma Kalaallit Nunaata nammineq nunanut allanut politikkikkut soqutigisaanik isumagisaqartussaavoq.

- Tamanna ilumuussappat, Kalaallit Nunaat akuerineqarsinnaanngilluinnarpoq, Søren Espersen oqarpoq, Namminersorneq pillugu inatsimmi Kalaallit Nunaata nunanut allanut sillimaniarnikkullu politikikkikkut qanoq iliorsinnaaneranut killiliussat ersarilluinnartut innersuussutigalugit.

Namminersorlutik Oqartussat nunanut allanut isumannaalisaanikkullu politikkimut attuumassutilinnik namminersuussillutik nunanik allanik oqaloqateqarnissaminnut piginnaatitaannginnerat Namminersorneq pillugu inatsimmi aalajangersarneqarpoq. Taamaammat aamma Kalaallit Nunaata Washingtonimi sinniisuutitaasa attaveqarnerat qanoq ittuunersoq Ministeriunerup isumasiorneqarnermini nassuiaateqarfigisariaqarpaa, Søren Espersen oqarpoq.

Tamatuma saniatigut Søren Espersenip Naalakkersuisut siulittaasuata Aleqa Hammondip oqaaserisimasai arlallit nuannarinngilai.

- Naalakkersuisut siulittaasortaavat, Aleqa Hammond, piffissami kingullermi, ilaatigut uranimik piiaanissaq pillugu suliamut atatillugu, nammineq Siumullu pissusilersuutaanik nuanninngitsupilussuarnik ersersitsisimavoq, allaat Danmarkimik appilasuussinissaq ileqqupalaarilersimallugu, malittuinnarlu Namminersorneq pillugu inatsit inatsisillu tunngaviusut unammillertarlugit.

- Taamaammat isumasiuinissami Kalaallit Nunaata pisortatigoortumik pissusilersuutigisartakkaminik allanngortitsisimanera Ministeriunermut isummerfigeqqussavara, Søren Espersen oqarpoq.