DF: Meeqqanik atornerluisimasoq unitsinneqartariaqarpoq
Nakorsap niviarsiaqqamik atornerluisimasutut eqqartuunneqarsimasup ukiumilu ataatsimi parnaarussivimmiittussatut pineqaatissinneqasimasup, Paamiuni napparsimmavimmi qaammatini pingasuni taartaasimanera pillugu, Dansk Folkepartip peqqinnissaq pillugu oqaaseqartartua Liselott Blixt, maanna akuliuppoq.
Naak eqqartuussaareeraluarluni nakorsatut sulisinnaanermut akuersissutini nakorsap pigiinnarsimammagu, Liselott Blixtip tupigusuutigaa.
- Pineqaatissiinerup soorunami ilagisimasariaqaraluarpaa, nakorsap meeqqanut nakorsaasinnaajunnaarsitaanera, taanna Ekstra Bladet-mut oqarpoq.
Kisianni Danmarkimi Peqqinnissamut Qullersaqarfiup nakorsat meeqqanik kinguaassiuutitigut atornerluisimasut imaluunniit atoqatigiinnermut tunngasunik pinerluuteqarsimasut, tamakkiisumik killilimmilluunniit nakorsatut sulisinnaajunnaarsissinnaanngilai, nakorsaaneq Anne Mette Dons, Peqqinnissamut Qullersaqarfimmi sulisunut nakkutilliinermi pisortaasoq taama oqarpoq.
- Nakorsat suliassaminnut pikkorissusaat taamaallaat nalilersinnaallugillu nalilertussaavavut - imaluunniit nakorsaq tarnikkut peqqiilliuuteqarnersoq atornerluisuunersorluunniit. Eqqartuussiviit nammineerlutik aalajangertussaavaat, nakorsaq meeqqanik kinguaassiuutitigut atornerluisimasoq imaluunniit kinguaassiuutitigut pinerluuteqarsimasoq meeqqanik allanilluunniit katsorsaasinnaajunnaarsitaassanersoq.
Taamaattorli eqqartuussiviup angummik eqqartuussinerminut atatillugu iliuuseqarsimannginnera Anne Mette Donsip tupigusuutigaa.
- Soorunami tunngaviusumik isigalugu angutip meeqqamik atornerluisimasutut eqqartuussaasimasup, meeqqanut tunngasunik suliaqarnissaa toqqissisimasanngilaq, nakorsaaneq aviisimut oqarpoq.
