DF: Kuupimmut sukkanerpaamik sianertoqartariaqarsimagaluarpoq

Libyami sorsunnermi peqataajartortitsinissamut aalajangernermut Danmarkimi naalakkersuisut Kalaallit Nunaat Savalimmiullu ilisimatissimanngimmagit tamanna assuarnartuusoq, Dansk Folkepartimi Kalaallit Nunaat pillugu oqaaseqartartoq, Søren Espersen, oqarpoq.
Allattoq Carla Davidsen
maajip 11-at 2011 08:32

Nunanut allanut tunngassuteqartunik- naalagaaffiullu isumannaatsuunissaanik politikkikkut aalajangiisoqartillugu Naalakkersuisut siulittaasuata aamma Savalimmiuni lagmandip ministeriunermiit ingerlaannaq ilisimatinneqartarnissaat Søren Espersenip kissaatigaa.

- Naalagaaffeqatigiinuku sorsunnermi peqataajartulersut, sakkutuullu savalimmiormiut kalaallillu peqataasussaapput. Taamaammat sukkanerpaamik sianertoqartariaqarsimagaluarpoq, aviisinimi atuartariaqanngilaat, Søren Espersen KNR-imut ullaaq oqarpoq.

Libyami sorsunnermut peqataajartortitsinissaq Folketingimi aalajangiunneqarmat ilisimatitsisoqarsimannginnera Søren Espersenip mamiatsaatigaa.

Taamatut aalajangiisoqartillugu Folketingip nunanut allanut tunngasunik ataatsimiittartuinik ilisimatitsinissaq naalakkersuisut pisussaafigaat, kalaallinimmi savalimmiormiunillu tassani ilaasortaqarpoq. tamannali naammanngitsoq Søren Espersen isumaqarpoq.

- Nunani taakkunani marlunni siulittaasut ingerlaannaq kalerrinneqartariaqarput, Søren Espersen oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq