DF: Katersugaasivissuup oqaatsip eskimop atorunnaarnissaanik aalajangernera tunngavissaqanngilaq
Oqaatsip "Eskimo"p mamiatsannartuunera pillugu aasarmanna oqallittoqangaatsiarpoq, nioqqutissianilu arlalinni taaguutaata atorunnaarsinneqarnissaa oqallisigineqarluni.
Danmarkimi sikuliorfiup Hansens Is-ip sikualiani oqaaseq eskimo "O`Payo-"mik taaguuteqartilerpaa.
Taava Danmarkimi katersugaassivissuup nalunaarutigaa, saqqqummersitaminni taaguuteqartumi "Eskimoer og Grønland " oqaaseq eskimo peerniarlugu.
AAMMA ATUARUK Danmarkimi katersugaasiviup issittoq pillugu saqqummersitsinerni oqaaseq eskimo atorunnaaraa
Oqaatsip eskimop atorneqara pillugu danskit kultureqarnermut ilageeqarnermullu ministeriat Joy Mogensen ullumi sisamanngornermi isumasioqatigineqassaaq.
Ministerip apersorneqarnissaanik qaaqqussisuuvoq, Pernille Bendixen Dansk Folkepartiimi folketingimi ilaasortamut sinniisussaasoq.
Ministerip apersorneqarnissaannut qaaqqussinermut pissutaavoq, Danmarkimi katersugaasivissuup oqaatsip eskimop atorunnaarnissaanut aalajangernera, Pernille Bendixen oqarpoq.
- Katersuugassivissuup taama aalajangernera ajortumik kinguneqassasoq isumaqarpunga, taamaattumik kultureqarnermut ministerimik nukittuumik atorfissaqartitsivunga danskit oqaluttuarisaanerannik oqaasiannillu illersuisumik Bendixen oqarpoq.
Danmarkimi katersugaasivissuup Nationalmuseumip aalajangerneranut pissutaavoq, oqaaseq eskimo amerlasuunit nikassaanertut paasineqartarmat, katersugaasivimmi pisortaq Martin Appelt aviisimut Kristeligt Dagbladimut siusinnersukkut taama oqaluttuarnikkuuvoq
Pernille Bendixeni-li isumaqarpoq, katersugaasiviup taama aalajangernera uggornartuusoq.
- Katersugaasiviup ingammik naalagaaffimmit tapiiffigineqartartup oqaatsip atuinnarneqarnissaaanut immikkut pisussaafeqartoq isumaqarpunga.
- Taava katersugaasivimmut isertut nassuiarneqarsinnaapput oqaaseq eskimo qaangaanerusoq nikassaanertut atorneqartarmat, soorunalimi ullumikkut nikassaanertut atunngilarput, Bendixen oqarpoq.
AAMMA ATUARUK Aaja Chemnitz sikunik nioqqutissiortunut: Oqaaseq eskimo atorunnaarsiuk
Isumasioqatigiinnemi kultureqarnermut ilageeqarnermullu ministeri Joy Mogensen akissuteqassaaq, katersugaassivissuup Natinalmuseumip saqqummersitamini oqaaseq eskimo atorunnaarmagu isumaqatigineraa.
- Neriuppunga kultureqarnermut ilageeqarnermullu ministerip tapersersussagaanga, oqarlunilu oqaaseq qangaanerusoq atorneqarsimasoq atorunnaartariaqanngimmat, ullumikkullu suli atorneqartartoq, Pernille Bendixen oqarpoq.
Folketingemi kultureqarermut ilageeqarnermullu ministerip Joy Mogensenip isumasiorneqarnera folketingip nittartagaatigut tooqqaarnnartumik malinnaavigineqarsinnaavoq.
