Assi: Toqqorsivik/Arkiv

DF: Kalaallit Nunaat kinguaassiutitigut atornerluinerit pillugit avataanit aqunneqalerli

Danmark meeqqanut aamma meeqqat pillugit nunat tamalaat isumaqatigiissutaannut naammassineqanngitsumut pisussaaffeqarpoq, Søren Espersen taama isumaqarpoq.

Meeqqat kinguaassiutitigut atornerlugaasarnerat nunatsinni suli ajornartorsiutaasupilussuuvoq.

Nunatsinni meeqqat 1995-imi kingusinnerusukkulluunniit inunngortut tallimaagaangata ataaseq kinguaassiutitigut kannguttaatsuliorfigineqarsimasoq, Innuttaasut peqqissusaannik 2018-imi missuinermi kisitsisini nutaani tamanna takuneqarsinnaavoq.

Ajornartorsiullu Tunumi annertunerpaavoq, Tasiilamimi pigisaanilu innuttaasut 60-it inorlugit ukiullit affaasa missaat alliartornerminni kinguaassiutitigut atornerlunneqarsimallutik oqaluttuarput.

Danmarkip Radioata piviusulersaarusiaani ataaasinngornermi unnukkut aallakaatinneqartussami tamanna ersersinneqarpoq.

Danmarkimi oqartussat sakkortuumik iliuuseqartariaqarput, Folketingimi Kalaallit Nunaannut tunngasunut oqaaseqartartoq Søren Espersen (DF) taama isumaqarpoq.

Nunarpullu Danmarkimit aqunneqartariaqarsoraa.

- Kalaallit Nunaanni oqartussat suliassartik naammassisinnaanngilaat. Naalagaaffiup isumaginninnermullu ministerit taarseraattut Namminersorlutik Oqartussat ikiorumallugit neqeroorutigisimavaat, tamatumunngalu qujaannartoqarpoq.

AAMMA ATUARUK Søren Espersen: Isumaginninnermut suliassaqarfik Danmarkip tigugallartariaqarpaa

- Danmark meeqqanut aamma meeqqat pillugit nunat tamalaat isumaqatigiissutaannut naammassineqanngitsumut pisussaaffeqarpoq, Søren Espersen taama isumaqarpoq.

Danskillu isumaginninnermut ministeriat nunatsinnut suliartortitsisariaqarsoraa – ilaatigut politiinik, oqartussanik isumaginninnermillu suliaqartunik nunatsinnukartitsilluni.

- Vording Kommunimi taama pisoqaraluarpat iliuusissat assinginik iliuuseqartoqartariaqarpoq, Søren Espersen oqarpoq.

Meeqqat kinguaassiutitigut atornerlunneqarsimasut pinngitsaaliissummik arsaarinnissutigalugit nunatsinni Danmarkimiluunniit angajoqqaarsianut inissinneqarsinnaanerat aamma periarfissaasinnaasoq oqaatigaa.

AAMMA ATUARUK Folketingemi amerlanerussuteqartut Nunatta akisussaaffii ataqqivaat

Isumaginninnikkut akuliuttoqarnissaa Peqatigiiffiup Kalaallit Meerartaata isumaqatiginngikkaa

Taamaaliortoqarnissaanilli siunnersuut atorsinnaanngitsoq, Peqatigiiffiup Kalaallit Meerartaanni qullersaq, Puk Draiby, isumaqarpoq.

- Tamanna aaqqiissutaasinnaasorineqarsinnaanngilaq. Meeqqamut kalaallit kulturiannik sungiusimasaqarluni peroriartortumut kalaallisullu oqaaseqartumut ajoqutaassaaq, Puk Draiby oqarpoq.

Qallunaanngorsaanermut, kalaallit meeqqat 60-ikkunni Danmarkiliartitaasarnerannut, assersuunneqarsinnaavoq.

- Taakku ilarpassui sorlaarunnertik pissutigalugu inuunerminni ajornartorsiulerput, Puk Draiby oqarpoq.

Taassuma aamma Danmarkimi oqartussat imaaliallaannaq aaqqiissutissamik nassarlutik nunatsinnukartitsisinnaannginnerarpai.

Nunatta nammineerluni ajornartorsiummik aaqqiisariaqarsoraa, kinguaassiutitigullu atornerluisarnerup akiorneqarnissaanut iliuusissat pillugit pilersaarut ukiuni sisamani atuuttussaq siorna suliarineqartoq innersuussutigalugu.

Tamatumunngalu peqatigitillugu Peqatigiiffiup Kalaallit Merartaata kinguaassiuutinik ilinniartitsinerup annertusarnissaa sulissutigaa, meeqqat killiliinissaannik ilinniartinnissaat kinguaassiuutitigullu kannguttaatsuliornerit ammasumik oqaluuserineqartalernissaat siunertaralugu.

 

 

 

 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat