DF: Fogh Rasmussenip Tartupaluk pillugu canadamiut saaffigisariaqarpai

Tartupaluk, Hans Ø, suli assortuussutaaqaaq.

Qeqertannguaq taanna Danmarkip Canadallu akornanni Kennedyp ikerasaaniippoq, Kalaallit Nunaata avannaatungaani.

Dansk Folkepartip maanna piumasarilerpaa, Danmarkimi ministeriunerup, Anders Fogh Rasmussenip, Canadami ministeriuneq attaveqarfigisariaqaraa, killeqarfiup assortuussutaanera qaangerniarumallugu. Canadami Illersornissamut ministerip, Bill Grahamip, kalerreeqqaarani pingasunngormat Tartupalummiissimanera Dansk Folkepartip taama piumasaqalerneranut pissutaavoq.

- Danmarkip Canadallu ilisimaaraat, qeqertaq taanna pillugu assortuunneq nunarsuaq tamakkerlugu eqqartuussivimmut arlaatigut anngukkumaartoq, taamaammat atugartuunngorsarsimasutut iliuuseqartariaqarpugut. Neriuutigaara ministeriunerup canadamiut ministeriunerat tamanna pillugu oqaloqatigisinnaassagaa. Paarlakaalluni erfalasuleqattaarneq aamma unitsittariaqarparput, Dansk Folkepartimi nunat allat pillugit oqaaseqartartoq, Søren Espersen oqarpoq.

Tartupaluk Canadap Danmarkillu ukiorpaalunni assortuussutigereerpaat, canadamiullu ministerertik tassaneereermat maanna isumaqalerput, qeqertaq taanna Canadamut atasoq, canadamiut tusagassiorfii nalunaarput.

Canadami naalakkersuisut danskit naalakkersuisuinut siumut ilisimatitsisimanngillat Illersornissamut ministerertik, Bill Graham, Tartupalummukassamaartoq.