Obama prins Harrymut: Det Hvide Hus qimallugu toqqissiallannarpoq

Amerikamiut præsidenterisimasaata nuliani ullaakkorsiornermi oqaloqatigisinnaanngorlugu, namminerlu ullormut pisassanik isumagisaqarsinnaalerluni kiffaanngissuseq misigisimalerlugu oqaatigaa.

Prins Harryp BBC-mi aallakaatitsisutut pulaartuusup Obamap præsidentiugunnaarnerata kingorna apersueqqaartuusup Obama arlariinnik apeqquteqarfigaa.

- Suliaq alutornarmat maqaasivara, Obama oqarpoq, peqqinnissamullu aaqqissuusseqqinneq præsidentiunermini politikkikkut angusamini pingaarnerpaanerarlugu erseqqissaatigalugu.

Obamap apersorneqarnermini Donald Trump aqqatigut eqqaanngilaa, inuilli attaveqaqatigiittarfii avissaartuutsitsingaatsialersinnaasut mianersuunnissai pisariaqarnerarpaa.

- Aqutsisuusimasut tamarmik nalunngilaat internettikkut ataatsimoorfiit qanoq pilerseqqinneqarsinnaanersut, Obama oqarpoq, erseqqissaaqqillunilu:

- Internettimi navianartut ilaat tassaavoq inuit piviusoq assigiinngitsumik paasisinnaammassuk, tamannalu paasissutissat atorlugit maanna isummanik pigiliutiinnakkanik aalajangiusimaannartitsisinnaavoq.