Qilalukkat qaqortat amerliartoqqilersut
Kisitsinermi kingullermi 2012-imi ingerlanneqartumi paasineqarpoq Nunatta kitaani qilalukkat qaqortat 9000-it missaanniittut.
1970-ikkunni ukiumut tusindit missaannik qaqortanik pisaqartoqartarpoq, 80-ikkunnili 90-ikkunnilu pisarisinnaasat 500-nut appartinneqarsimapput.
Pinngortitaleriffik isumaqarpoq qilalukkat qaqortat amerlinerannut pingaarnertut peqqutaasoq 2004-mi killilersuilerneq ukiumut qilalukkat qaqortat 300-it pisarineqarsinnaanngorlugit, aammalu ukiuni kingullerni qilalukkat qaqortat piniartunut piniassallugit ajornarnerulersimaneri.
Maannakkut ukiumut pisarisinnaasat eqqarsaatigalugit biologit eqqoriarpaat 2020-ip tungaanut qaqortat amerleriarnissaannut 70 procentimik periarfissiisoq, Kalaallit Nunaanni Pinngortitaleriffik tusagassiuutinut taama allappoq.
