Destination Disko piviusunngulerpoq
Siulersuisunngortut tassaassapput ukiuni tulliuttuni Destination Diskop ineriartortinneqarnissaanut sunniuteqarnerpaajusussat.
Qanga piorsaasoqanngikkallarmat kalaallit inooriaasiannik takussutissatut nunaqarfiusaq Qasigiannguit eqqaanni pilersinneqassava imaluunniit suut allat pilersitassatut Destination Diskop nalilersussavai? Apeqqutinik tamakkuninnga siulersuisunut ilaasortanngorlaaq Augusta Salling paasinaavigaarput.
- Destination Diskomi siunertaavoq tamakku suliniutit naqqanit aallartitassat namminersortunit aallartinneqartariaqartut isumaqarpunga aamma aallarnisaaniartut Destination Diskomit tapersersorneqarlutillu siunnersorneqarlutik anguniagartik angujaarnerussagaat isumaqarpunga, Augusta Salling oqarpoq.
Augusta Salling Qeqersuup Kommuneannut sinniisuunermi saniatigut takornariaqarnermik ukiuni arlalinni ingerlatseqataasimavoq. Destination Diskop suliassai suussappammita.
-Destination Diskop suliassai tassaapput, Qeqertarsuup Tunuani takornariaqarnerup inerisarneqarnerani ataqatigiinnerusumik kiisalu takornariat illoqarfiit tulleriiaarnerullugilluunnit angalatinniartarnissaat. Taamaalilluni takusassat soqutiginartut amerlanerusut orninneqarsinnaasut nittarsaanneqarnerat annertunerusumik ingerlanneqarsinnaaniassammat. Tamannalu pingaaruteqartorujussuuvoq.
Destination Diskop siulersuisuinut borgmesterit pingasut ilaasortaapput, borgmesterimut tullersorti ataaseq, kommunaldirektøri ataaseq maannamullu siulittaasuugallarpoq Greenland Tourismimi atorfilik. Aasiaat Kommuneat sinnerlugu ilaasortassaq sapaatip-akunnerata tulliani toqqarneqassaaq.
