Destination Disko-p pisortaa tunuarpoq

Allattoq Mads Lynge
aggustip 08-at 2005 11:24

Destination Diskomi pisortaasussaagaluaq piffissaq kingulleq inuttut pissuteqarluni atorfissani suli aallartinnaguluunniit tunuarniuteqarsimavoq.

Taamaasilluni kujataani destinationschefitut atorfeqarnikoq Salik Hard, utaqqiisaagallartumik pisortatut Greenland Tourismip atorfeqartussatut ivertissimavaa.

Taamaasilluni Salik Hard qaammatini tulliuttuni marlunni Qeqertarsuup Tunuani takornariaqarneq pillugu nittartagaliussaaq, paasissutissanillu takkuissamik quppersaliussalluni.

Septembarip qiteqqunnerani Københavnimi Nunat Avannarliit allaffeqarfittaavanni Nordatlantisk Bryggemi Travel Mart ingerlanneqalerpat quppersagaq atorneqartussaammat.

Qeqertarsuup Tunuani takornariartitsivimmi pisortaagallartup aamma Avannaani qitiusumik allaffeqarfissamut iserternissaq aaqqissuussinissarlu isumagisussaavai.

Qeqertarsuup Tunuani kommunalbestyrelsit nutaat akornganni Destination Diskomi siulersuisussanik toqqaasoqareerpoq, taakkualu ukiariartornerani ataatsimeeqqaarnerminni aalajangertussaavaat kingullermik pisortassarsiortoqarmat qinnuteqartut akornganni pisortassamik toqqaasoqassanersoq imaluunniit inuttassarsioqqinnikkut pisortassarsiortoqaqqissanersoq.