Dennis Patterson Nunavummi senatorinngorpoq
Dennis Patterson Canadap senatianut Willie Adams, Inuit siullersaattut senatimiittoq taarserlugu inissippoq. Dennis Patterson inatsisilerituujusoq nunavumi ilisarisimaneqarluarpoq, Nordvestterritories-ip naalakkersuisuinut ukiuni 16-ini ilaasortaasimagami taakkunannga ukiut sisamat naalakkersuisut siulittaasuusimalluni, Nunavullu pilersinniarlugit isumaqatiginniniarnernut peqataasimalluni.
Naak ukiorpassuarni avannaani najugaqarsimagaluarluni kujataamiit kingornisuuvoq. Nunavimmiorpassuillu isumaqarput Inuk toqqarneqarsimasussaassagaluartoq. James Ituluk, nunavut tungavik incorporated-imi siulittaasup tullia tusagassiorfinnut oqarpoq, Pattersonip sulilluarnissaa qularinngikkini, taamaakkaluartoq Inuk toqqarneqarsimassasoq kissatiginartikkaluarini pingaartumik Patterson Nunavummi najugqarunnaarnikuummat Vancouverimilu najugaqarluni.
Nunavummilu najugaqartut 85 %-ii Inuummata. Senatimut 105-inik ilaasortaqartumut toqqarneqarneq ataqqinaataavoq, senatillu Canadami inatsisit misissortarpai akuttugaluartumillu inatsisit itigartitsissutiginissaannut pissaaneqarluni. Taamaakkaluartoq senatimi suli inuk ilaasortaavoq, taassasoq Charley Watt Nunavimmi Kuutsuaq-meersoq.
