Den Dominikanske Republik unammeqataasinnaajunnaarsitaasoq
Amerikap nunavittaani assammik arsartartut kattuffiata Timersornermut Ileqqorissaarnermullu ataatsimiititaliaata Den Dominikanske Republik 2014-imi juunip 30-iata tungaanut assammik arsarnermut peqataasinnaajunnaarsikkallarsimavaa. Unammisartut inuiaassutsimut uppernarsaataannik kiisalu unammisartut passinik assigiinngitsunik atugaqarnerannik ajornartorsiuteqarnera tamatumunnga pissutaavoq.
Kalaallit Nunaata taamaasilluni Den Dominikanske Republik Mexico Citymi marsip aallaqqaataani unammisussaajunnaarpaa.
Amerikap nunavittaani assammik arsarluni anngunniunnerit februaarip 25-ianit marsip aallaqqaataata tungaanut ingerlanneqartussaapput.
Unamminissat allannguuteqarnerisigut unammisartoqatigiit sinneruttut unammersuarnermi ullunik qasuersaarfissaannik tunineqarsimapput. Tamannali kalaallit assammik arsartartut iluaqutiginavianngilaat, dominikanerimmi kingulliullugit unammisussaagaluarpaat, taamaattumillu ullunik qasuersaarfissanik amerlanernik tunniussisoqarnera iluaqutigissanagu.
