Demokratit IA-lu: Naammaginanngilluinnarpoq
Qaqugulu suliap naammassineqarnissaa suli oqaatigineqarsinnaanngilaq.
Inatsisartut maanna ataatsimiinnerminni suliassaqarpallaarnerat sukumiisumillu paasissutissat suli amigaataanerat kinguartitseqqinnermut peqqutigineqarput.
Inatsisartut Aalisarnermut ataatsimiititaliaanni ilaasortat Inuit Ataqatigiinneersut Demokraatineersullu tamanna akueriuminaatsippaat.
Jens B. Frederiksen, Demokraatineersoq imatut oqarpoq:-Tassa naalakkersuisup suliassaani suliarisimanngilaa, qangarsuarlili piareersarneq pisussaagaluarpoq. Taamatullu oqarneq Inuit Ataqatigiinni aalisarnermut ataatsimiititaliami ilaasortaatitamit ilalerneqarpoq, oqarpormi:-Ajuusaarnartarujussuuvoq keermiaasiit aalisarnermut inatsit kinguartinneqarmat, tassami 2005-imiilli naalakkersuisut inatsisartunit piumaffigineqarput Fiskerikommisioniliornissamik, tassami allanguutissat misissorneqartussaapput.
