Demokrati naqqaniit ilinniarpaat
- Sorsuutigissavara qinngasaarisoqannginnissaa, tusarnaarusuppassilu.
Ilaatigut oqaatsit tamakku qineqqusaarutaapput, atuartut arfineq pingasut Atuarfik Hans Lyngemi issiavissaq pilerigineqarluartoq unammissutigineqalerpat.
Inersimasut qinersisarnerat atorlugu qinersisoqarnissaanut pissutaavoq, atuarfiup ingerlaneranut kikkut tamat oqartussaaqataanerat ilinniartitsissutigineqarmat. Qinersisinnaasullu 1.klassiniit qummut 7.klassi tikillugu atuartuupput.
Qineqqusaarnermilu aamma allagartarsuit qineqqusaarutit atorneqarput.
Atuartunullu qineqqusaarneq, ippassaq ullaap tungaa nalunaaqutaq qulit qaangilaara atuarfimmi ingerlanneqarpoq, tamannalu iluatsilluartoq atuarfimmi ilinniartitsisoq Mette Labansen oqarpoq.
Siulittaasumut qinersineq pingasunngorpat september ip 28-ani nalunaaqutaq qulit qaangerlugit tanneq pingasuniit, nalunaaqutaq aqqarngup tungaanut ingerlanneqassaaq. Atuartullu qinersiviit qanittumi Folketingemut qinersisoqarnerani atorneqartut atussavaat.
Qinersinerup nalaani ilinniartitsisut nakkutilliisutut paarsisutullu atorneqassapput. Qinersinerlu naammasseriarpat, ingerlaannaq kisitsineq ingerlanneqassaaq kinguninngualu siulittaasunngortoq suaarutigineqassalluni.
Qinersiviit Kommuneqarfik Sermersuumiit atukkiunneqarput.
