Demokrati meeqqat inunngisaanni

Atuartut katillugit 210-nik amerlassusillit tamarluinnarmik ullumikkut atuariartorsimapput, taamaasillutillu tamarmik qilanaareqisaminnut, tassalu qinersinissamut peqataasinnaallutik.

Nalunaaqutaq qulit qaangerlugit tanneq pingasut atuarfiup pisortaata Helene Berthelsenip qinersinissaq ammarlugu oqaassivoq, kikkut tamat oqartussaaqataanerata pingaassusaanik, atuartullu atuarfimminnut aamma akisussaaqataanerat qanoq pingaaruteqartigisoq.

- Qinersinerup inernera qilanaaraaraa, taamaasillungalu qinersineq ammarpara, Helene Berthelsen oqarpoq.

Atuarfimmi qinersisinnaasut nukarliit ilaat arfiniliinnarnik ukiulik Natasja Lynge 1.a-mi aturtuuvoq.

- Pissanganarpoq, qinersisunik Danmarkimi takoreernikuuvunga,  aamma massakkut qinigassara aalajangiutereerpara, Natasja oqarpoq.

Qinersinerup ingerlannerata ilutigisaanik, qinigassanngortittut tamarmik arfineq pingasuusut atuarfiup atuakkanik atorniartarfiani tusagassiortunik katersortitsipput. Qinigaanissanngortittullu tamarluinnarmik qinigaanissaminnut ilimasuuteqarlutik. Apeqqarissaarfigineqarnerminni tamarmik assigiimmik oqariartuuteqarput, tassalu atuarfik nuannernerusoq, kiisalu atuarfik qinngasaaruffiunngitsoq sulissutiginiarlugu.

Qinersineq nalunaaqutaq aqqanernut naammassineqarmat,  ilinniartitsisut qinersinernik kisitseqqisaatinneqarput. Qinersinermi ajugaasuuvoq 7.a-mi atuartoq Rumle Labansen 72-nit qinerneqartoq tullersortigaalu 63-nik taaneqartoq Rosalia Stenbakken sinniisussatut inissittoq.

Hans Lyngep Atuarfiani pisoq atuarfeqarfinnut kaammattuutaalluarsinnaasoq, Helene Berthelsenip oqaatigaa. Nangillunilu oqaatigalugu atuartut siulersuisuisa taamatut isumassarsialatsialattut pilersitaat siunissami ingerlaannassasoq takorloorlugu.

Hans Lyngep Atuarfiani qinersisoqarnerani, Nuummi Kommunal bestyrelsimut ilaasortanik politikkerinilluunniit nuimasunik najuuttoqanngilaq.