Demokraatit:Naalakkersuisut unioqqutitsipput
Naalakkersuisut siulittaasuata ESU aqqutigalugu aningaasat annaaneqartut pillugit nassuiaataa naammanngilaq, akisussaaffimmillu qimaraatiginninneruvoq, taama Demokraatit sinnerlugit Inatsisartuni ilaasortaq Palle Christiansen oqarpoq. Aalisarnermut naalakkersuisuusimasup Simon Olsen-ip ESU-mut tunngatillugu suliamik pisoqqamik nangitsiinnarsimaneranik Naalakkersuisut siulittaasuata Hans Enoksen-ip nassuiaataa eqqunngitsuunerarpaa:
- Akisussaaffik allanngorneq ajorpoq suliamilluunniit suliarinerlutaasumik nangitsinermi taamaappoq, aaqqittariallit aaqqiivigisariaqarput, tamannali Simon Olsen-ip Naalakkersuisuunerata nalaani pisimanngilaq, illuatungaanili aningaasanit ESU-mi annaasaqaataasunit Simon Olsen-ip 2003-mi naalakkersuisuunerata nalaani, 64 aamma 68 mio.kr-nit akornanniittut ESU aqqutigalugu atukkiunneqarsimapput, Palle Christiansen erseqqissaavoq. ESU-lu aqqutigalugu atorniartunut aningaasaliisarnerup ingerlanneqarnera aningaasariviit atukkiisarnerattut aaqqitaagaluartoq Palle Christiansen-ip erseqqissaavoq.
-Atukkiinerni atukkanillu utertitsiniarnermi suleriusissaq malinneqarsimanngilaq, atorniartut akiliisinnaassusaat naliliiffigineqartarsimanngilaq, tamatumalu saniatigut atukkerneqartut akiligassaannik nassinneqartarsimanngillat. Allakkallu akileeqqusissutit malinneqarsimanngippata, suliaq akiliisitsiniartarfimmut ingerlateqqinneqartussaavoq, tamannali aamma pisarsimanngilaq, Palle Christiansen oqarpoq. Naatsueqqissaartarfik Deloitte aamma Touche suliamut atatillugu misissuereerluni naliliivoq atukkiisarnermi suleriusissaq malinneqartarsimanngitsoq tamannalu pillugu Palle Christiansen isumaqarnerarpoq naalakkersuisut taamallillutik arlalitsigut unioqqutitsisimasut.
- Naalakkersuisuni ilaasortaqarsimavugut naalakkersuisuunermi nalaani pisunut akisussaarusunngitsumik, taannalu akissussaaffimmik tiguserunngippat naalakkersuisut siulittaasuat pisussavoq tigusissalluni tamannali pinngilaq. Allatullu ajornassappat pisortaqarfiup pineqartup aallaqqaataaniit misissuiffigineqarnissaanik piumasaqarnissaq avaqqukkuminaassaaq, Palle Christiansen oqarpoq.
Isornartorsiuinerlu tamanna Inatsisartut Kukkunersiuinermut Ataatsimiititaliaata 2003-mi Landskarsip naatsorsuutaasa akuersissutigineqarnissaat pillugu Isumaliutissiissutaani takuneqarsinnaasoq Palle Christiansen oqarpoq.
