Demokraatit Uummannami siulittaasuat tunuarpoq

Demokraatit Uummannami siulittaasuat ilaasortatut siulittaasutullu tunuarpoq. Taamali pisoqarnera Demokraatit nuna tamakkerlugu siulittaasuata ajorusuutiginngilaa. Qasigiannguani Qeqertarsuamilu ukiormanna Demokraatinit anisoqareerpoq. Partiimit peertussat piiarput, taamaattussaannaavoq, Per Berthelsen oqarpoq.

-Maannamut inuit taakkua ataasiakkaannguit pingasut tusarnikuusagut tassaapput sunnguamilluunniit partiimut tutsiunneq ajortut, arlaannilluunniit immersueqataaneq ajortut, arlaannilluunniit immersueqataaneq ajortut. Tassa isumaqaannarpunga partiip aalajaatsumik isummersornera aallaavigalugulu sanngiitsut massakkut piiarneqartut, tamannalu pinngitsoorneqarsinnaanngilaq. Maanna partii tunuliaquteqarpoq atitoorujussuarmik tunngaveqartumik, uanga oqartarnera malillugu, nukittornikorujussuuvoq tassuuna.

Berthelsenimut ammasunik ullumi allakkamini erseqqissaatigaa partiip nunaqarfinnut Uummannami Demokraatit siulittaasuat Mikkel Jeremiassen, Nuugaatsiameersoq Per isorliunerusunullu ineriartortitseqataarusussuseqannginnera, pisuussutinik uumassusilinnik atuineq eqqarsaatigalugu ingasattajaartumik piniarnermillu inuussutissarsiutilinnut "uummateqanngippasissumik" politikkeqarniarsarilernera aamma demokrati tunngavigalugu ingerlatsinngitsutut, partiillu immikkoortortaqarfiinut "tullaarinnittutut” Demokraatit maanna isigilersimagini.

Per Berthelsen aperaarput, inoqarfiit piniartoqarfiusut Demokraatit siulersuisuini puigorsimaneraat, akivorlu:

-Suut tamarmik pilersinneqartut katagaqartarput, kisianni aamma nalunngilara nutaanik pinngortoqartassasoq, taamaattumik annertunerusumik uagut tungitsinninngaanniit iliortoqassanngilaq. Taanna immaqa pinngortitami aalajangigaasumik ingerlariaaseq tassa nammineerluni ingerlassaaq.

Demokraatit siulittaasuat Per Berthelsen aamma oqarpoq, sumiiffinni arlalinni ilaasortanik taamaatittoqaraluartoq nutaanik immikkoortortaartuassallutik.