Demokraatit utaqqeqqusipput
- Namminersornerup eqqunneqarnera ukiut marlussuit aatsaat qaangiupput - Nunatta namminersortunngornissaanut oqallinneq sooq maannakkut piareersaleriissavarput, Demokraatit oqaaseqartuat, Niels Thomsen ilaatigut taama aperivoq.
Taassuma tunngavilersuutaasa ilagaat, oqartussaaffippassuit suli tigunngisagut naammasseqqaarlugit tunngaviusumik inatsisissap piareersarneqarnissaa aallutulersinnaagatsigu, aammalu namminersulivinnissarput akissaqartilerutsigut eqqarsaatip kusarnartup piviusunngortinnissaa eqqartulertariaqaripput aatsaat.
Tunngaviusumik Inatsisissamik piareersaataasussamillu isumalioqatigiisitaq 2012-p naalernerani aallartissasoq siunenrsuuteqartut partiit marluusut, tassa Inuit Ataqatigiit aamma Siumup siunnersuutigaat.
Naalakkersuisut siulittaasuata, Kuupik Kleistip akissuteqarnermini ilaatigut eqqaavaa, tunngaviusumik inatsit inuiaqatigiinni tunngaviulluni ineriartortitsinermut toqqavissiisussaasoq, taamaattumillu pingaaruteqartoq tunngaviusumik inatsisissaq ilusilersorniarlugu sulinerup sukumiisumik annertuumillu piareersarnermik tunngaveqassasoq.
