Demokraatit: Ukiup affaani najugaqareeraanni qinerseqataasinnaasariaqarneq atuutiinnarli

SIK- p ataatsimeersuarnermini naalakkersuinikkut anguniagassatut aalajangiussaa, tassa Inatsisartunut kommuninullu qinerseqataasinnaassagaanni sivikinnerpaamik ukiuni tallimani maani najugaqarsimanissamik aalajangiussinera, Demokraatit siulittaasuata Jens B. Frederiksenip isumaqatiginngilluinnarpaa. Qinerseqataasinnaassagaanni ukiup affaa maani najugaqarsimanissaq ullumikkut piumasaqaataavoq.
apriilip 08-at 2009 05:11

- Kalaallit Nunaat namminersulernermut alloriaraluttualerpoq, tamatumunngalu atatillugu inuinnaat oqartussaaqataanerannut tunngasut innarlernaveersaarlugit, Nunatsinni innuttaasunut tamanut qulakkeerneqartariaqarput. SIK-p maani innuttaasut ilarparujussuinut qinersisinnaatitaanermik arsaarinninniarnerat isumaqatiginngilluinnarpara, Jens B. Frederiksen oqarpoq.

Taassuma kanngunarnerarlugulu ajuusaarnartuunerarpaa, Sulisartut Kattuffiat inuiaqatigiinni naligiinngitsunik akersuutsitsiniarmat, taamatummi akersuunneq piffissami qaangiuttumi piffissartorfigineqarsimaqimmat. Tamanna Kalaallit Nunaanni maanna pisariaqartinneqanngilaq, oqarpoq.

Demokraatit siulittaasuata eqqaasitsissutigaa, Siumut siusinnerusukkut assingusumik Inatsisartunut aalajangiiffigisassamik siunnersuuteqareernikuummat.