Demokraatit tusarneqarusupput
Aningaasanut inatsisissap oqallisigineqarnerani tusarneqarusuppugut, Demokraatini siulittaasoq Per Berthelsen ullaaq Iterluarnaami ilaatigut ima oqarpoq:
- Ualeru oqallisilerutta, illuatungiliuttut aamma isummersuutaat naalaarluarneqassasut, aamma aalajangiinissamut atatillugu eqaassusilimmik naleqqussaallunilu, naalaarumallunilu suleqataajumassuseqartoqassasoq, amerlanerussuteqavinneq atornerlunnagu, taanna atuinnarlugu ikinnerussuteqartunit naqisimannissutiginiarnagu, kisianni oqaloqatigiinnikkut naalaaqatigiinnikkullu pisoqassasoq, taamaalilluta aningaasat nunatsinni iluaqutaanerpaamik atorsinnaaniassagatsigik, Demokraatit siulittaasuat oqarpoq.
Demokraatit isumaqataallutik taasissappata allannguisoqartariaqarpoq.
Demokraatit kisimik allannguutissanik kissaateqanngillat. IA-kkut aamma allannguutissamininnguanik kissaateqarput, Johan Lund Olsen oqarpoq. Soorlu meeqqat atuarfiinut, atuartut annerit najugaqarfiinut, kollegianut, tunngasut Aningaasanut inatsisissami annikitsunnguamik allannguuteqarfigineqarsinnaasut partiit illuatungiliuttut sinnerlugit Johan Lund Olsen ullaaq Iterluarnaami ilaatigut oqarpoq.
Aningaasanut aappaagumut inatsisissatut Naalakkersuisut siunnersuutaat, Inatsisartut ullumi siullermeerlugu oqaluuserissavaat.
