Demokraatit: Tapiissutit danskinit nakkutigineqassappata ajunngilaq
Kalaallit Nunaanni naalakkersuisut ilassinnissutissaminnik namminneerlutik aqutsilluarsinnaanngippata naalagaaffiup kukkunersiuisui Kalaallit Nunaannut ukiumoortumik aningaasaliissutaasartunik nakkutilliisinneqartariaqalersut, Martin Paldam aningaasarsiornermik ilisimatooq, Aarhusip universititianeersoq ippassaq taama isummersorpoq.
Nunatsinni naalakkersuisunut illua´tungiliuttut partiip Demokraatit siulittaasuat Per Berthelsen isumaqarpoq, naalagaaffiup kukkunersiuisuisa aningaasaliissutinik nakkutilliisariaqalernissaat pisariaqalersinnaasoq.
- Nassuerutigisariaqarpara nunatsinni massakkut ingerlanerput peqqusiileqinaannartumik imaqarmat, taamaattumik Demokraatit tungaanninngaanniit ajuusaaraluarlunga oqartariaqarpunga, assigiinngitsut iliuuserineqarsinnaasut suulluunniit akuerissallugit piareersimavugut, nunatta ingerlanneqarneranut tatiginninnermik qaffassaataasinnaasussat. Neriuutigeqaara aqutsinissaq pinngitsoortissinnaagipput, kisianni isumaqarpunga nunatsinni politikkikkut akisussaasut isumaqatigiissutaat arlaanni pilersillugu sukangasuumik aammalu tatiginartumik aqutsineq pilersittariaqartoq pisariaqassappat Danmarkiminngaaniit ilusiliiniarnermi ikiuisinnaaneq ammaassivigalugu, Demokraatit siulittaasuat, Per Berthelsen Radioavisimut oqarpoq.
