Demokraatit suliffeqarfinnik aallartisaasunik amerlisaarusupput
Aallartisaaneq nunatsinni atugaavallaanngilaq, taamatullu ileqqoqalernissaq sulissutigissagaanni naqqanit aallartittoqartariaqarpoq. Nunatsinni inuusuttortavut siunissaminnik ilusiliiniarlutik takorluuisinnaasariaqarput.
-Naasussamik naatitsisinnarluni taanna paarilluaraanni, taava piffissap ingerlanerani inerititaqassaaq. Aallartisaaneq taamaappoq, aamma suliffeqarfiit anginngitsut amerlanerusut aallartisartariaqarpagut. Suliniutit angisuut naammanngillat, inuimmi suliniutinit angisuunit ungasissumi najugaqartut qanoq pineqassappat. Aallartisaasut pitsaanerusunik atugaqartinneqartariaqarput, aamma meeqqat atuarfianni aallartisaaneq sammineqartariaqarpoq, Allan Chemnitz Demokraatit tunuliaqutaralugit Inatsisartunut qinigassanngortittoq oqarpoq.
Aallartisaaneq meeqqat atuarfiani immikkut atuartitsissutaasuuppat tamanna nunamut tamarmut iluaqutaassagaluarpoq. Klassit assigiinngitsut suliffeqarfiusuusaarlutik kikkut pitsaanerusumik isumassarsisimanersut unammissutigisinnaavaat. Taamaaliornikkut nunatsinni inuusuttut meeraanerminiilli pigeriissagaluarpaat.
-Amerlassusilernissaat ajornakusoorpoq, aallartisaasulli ingerlalluartut pigilerutsigit tamanna annerusumik sunniuteqarumaarpoq. Taamaaliornikkummi suliffeqarfiit anginngitsut immaqa avammut nioqquteqarsinnaasut pigilersinnaassavagut, nunattalu karsia tassuuna aningaasanik pisariaqartinneqartunik isaatitsilerluni. Socialliberaliugama sapinngisamik namminersortunngorsaanissaq anguniagaraara, aallartisaasullu amerlisarnerisigut tamanna oqinnerusumik anguneqarsinnaavoq Allan Chemnitz knr.gl-imut oqarpoq.