Demokraatit siunissaq upperivaat

Demokraatit ukiuni arfinilinni siulittaasorimasaat Jens B. Frederiksen sapaatip-akunnerani kingullermi tunuarpoq, partiilu nutaami siulittaasussarsiortussanngorput. Partii sinnerlugu Inatsisartunut qinigassanngortittartut qinigaalluartartullu taamaalillutik nungukkallartutut oqaatigineqarsinnaapput.

Inatsisartuni ilaasortaatitaat amerlanerpaagamik 2005-imi arfineq-marluusimasut maanna marluinnanngorput. Oqalliffik unnugu nal. 19.30 aallakaatinneqassaaq. Oqalliffimmi peqataassapput partiimi siulittaasussatut sassartoq Anda Uldum aamma Demokraatit Inuusuttaanni siulittaasoq Randi Vestergaard Evaldsen. Demokraatit siunissaqarnersut aperineqaramik Anda Uldum ima akivoq:

- Partiitta anguniagaat allanngunngillat, inuttai soorunami allanngoraluarput. Partiitta ingerlaqqinnissaanut apeqqusiisut paasisinnaanngilavut, sumiluunniit, soorlu suliffeqarfinni allanilu kinguaariit nikittarmata sulisullu taarseraattarlutik. Uani aamma taama pisoqarpoq, taamaattumik isumaqanngilanga nukilaallisugut.

Kalaallit qungujulanerulersinneqarnissaat Demokraatit siorna qineqqusaarutigaat, massakkummita qanoq qungujulatigippat?

- Uagut qungujulasorujussuuvugut, naak Palle Christiansen aamma Jens B. Frederiksen annaagaluarlutigit. Annaasaqaraluarluta nukilaallisutut misigisimanngilagut. Anda Uldumip oqarneratut partiip iluani allannguisoqartarnissaa pingaaruteqarpoq, asuli uninngasuusiinnarnata ingerlariaqqinnissamut nukinnik nutaanik amigaateqartuaannaratta.

Demokraatit siunissaqarnersut qanorlu isikkoqarnersoq qulequtaralugit Oqalliffik unnugu nalunaaqutaq 19.30, tassalu arfineq-pingasut qeqqanut aallakaatinneqassaaq. Oqalliffimmik aqutsisuuvoq Alice Sørensen, Qanoruuminngaanneersoq.