Demokraatit: Siumut aamma Partii Inuit suleqatigissanngilagut

Partiit kikkunnik suleqateqarusunnerlutik kikkunnillu suleqateqarusunngilluinnarlutik nalinginnaasumik oqaatigerusuppiartanngilaat. Malunngorpammi qinersinissap tungaanut manna tikillugu pissutsit aamma taamaapput, Demokraatilli maanna nalunaareerput. Partiip Siumut imaluunniit Partii Inuit suleqatigerusunngilai.

Demokraatit maannakkutut suleqateqarnissartik ingerlatiinnarusuppaat, nalunaarutaallu aamma imatut paasisariaqassaaq siunissami Atassummik suleqatiginnikkusuttoqartoq. Aleqa Hammondili Nikku Olsenilu Jens B. Frederiksenimik parteeqataanilluunniit suleqatiginninniatariaqanngillat.

-Siumukkut tv-kkut takutereerpaat royalties/atuinermut akiliutit suunersut kiisalu qaqugukkut suliffeqarfiit taassumannga akiliitinneqarsinnaanerat nalugitsik. Tamanna aalassissimaarutaavoq. Qinersinerinnaanngitsoq aammali ingerlatsiviit Kalaallit Nunaanni aatsitassarsiorusuttut akornanni. Taamatut aalassassimaartitsineq Kalaallit Nunaannut iluaqutaanngilaq. Aamma Siumup nunamik aqutsisinnaanera nalornissutigaarput. Aningaasaqarneq ataatsimut isigalugu ilisimaarinnilluni isumagisariaqarpoq. Tamakkua Siumukkut amigaatigaat, inuiaqatigiinnimi amigaatigineqartut 1 miliaartit eqqartorneqaqisut qanoq iluarsiissuterqarfiginissaat aamma siunnersuuteqarfiginngilaat, Jens B. Frederiksen nassuiaavoq.

Demokraatit, IA kiisalu Kattusseqatigiit Partiiat naalakkersuisooqatigiileramik sivisuumik atassangatinneqanngikkaluarlutik, naapeqatigiinniartuarnermikkut patajaatsumik ingerlalersimapput. Tamanna Nunatsinnut, innuttaasunut partiinullu iluaqutaavoq. Minnerunngitsumik partiit annerit marluk iluaqutigisimavaat. Kisianni Kattusseqatigiit Partiiat Anthon Frederiksenip patajaatsumik ingerlalertissinnaasimanngilaa, ukiunilu tulliuttuni sisamani sunniuteqassangatinneqarani.

-Demokraatineersumik siuttoqarnermi Kalaallit Nunaanni sanaartornerup ingerlalluaqqilernera Siumup aamma piviusorsiorluni isummerfigisimanngilaa. Ukiunimi kingullerni 20-ni aatsaat inissianik attartugassanik sanaartortoqalerpoq. Nuummi sineriammilu sanaartornerit naammaginartumik agguataarpagut. Namminersorlutik Oqartussat sanaartornissamut aningaasaliissutaasa 2/3-lii sineriammi atorneqartut uppernarsaateqaraluartut – Siumup tamanna akuererusunngilaa, Jens B. Frederiksen oqaluttuarpoq.

Partii Inuit pillugit Jens B. Frederiksen iluartumik oqaasissaqanngilaq. Nunatsinnili saamerliuniat nutaat naalakkersuisooqatigilernissaat akuersaarsinnaannginnerarpaa.

-Nassuerutigisariaqarunarparput Partii Inuit ataasiinnamik anguniagaqartoq, tassalu kalaallisut oqalussinnaagaanni suulluunniit suliarineqarsinnaassasut. Partii politikkikkut takorluukkanik isumaliuutinilluunniit saqqummiinngilaq, tamannalu nikalluallannalaarpoq. Mannali iluatsillugu Partii Inuit tikilluaqqorusuppakka, neriuppunga ilimagalugulu tullianik Inatsisartunut qinersisoqannginnerani politikkerisaminnik ataqatigiissaarisimanissaat, Jens B. Frederiksen oqarpoq.