Demokraatit Siumullu: IA tunniutiinnartussaavoq
Inatsisartunili ilaasortaqataasut isumaqarput, partiimi apeqqummi tassani avissartuuteqqqanerup, sapaatit akunneranni kingullermi malunnarsisup, apeqqutaaginnalersippaa, tulliani qinersisoqartinnagu partiimi isumaqatigiittoqqalerumaarnersoq.
- Inuit Ataqatigiikkormiut kingusinnerulaartumik isumaqataalertarput, assigiinngitsuni apeqqutini naliginnaasuni. Aamma ilimagaara, una apeqqut pillugu aamma arlaanni isumaqataalerumaassasut, Siumup siulittaasua, Aleqa Hammond, taama siulittuivoq.
Taannalu oqarpoq, IA-mi isumaqataalinngippata, amerlanerussuteqartut aalajangiiumaartut.
Aamma Demokraatini neriuutigaat, uranimut naaggaarluinnarnerup atorunnaarsinnissaanut naalakkersuisoqatitik peqataalerumaartut.
Demokraatit politikikkut oqaaseqartartuat, Andreas Uldum aperaarput:
-Urani pillugu apeqqummi IA-mi allanngortoqalerpa?
Naluara. Neriuppunga taamaattoqarsinnaassasoq, Andreas Uldum akivoq.
IA sapaatit akunneranni kingullermi erseqqissarpaat, uranimut naaggaarluinnarneq maannakkut oqaluuserisassaanngitsoq.
Partimiit tikkuarpaat, uranimut naaggaarunnaarumannginerminnut, Nunatsinnut kingunerusinnaasunut kisiisa tunngaviginnginnamikkit, aammali atomi atorlugu nukissiorfiit sakkussionerlu tunngavinnut ilaammata.
Illuanili Demokraatit uranimik piiaaneq avatangiisit peqqinnissarlu pineqartillugit illersorneqarsinnaasumik pisinnaappat, naaggaarluinnarnerup atorunnaarsinnissaanut ajoqutissaqartitsinngilaat.
Naallu ima oqaraluarluni:
- Qoornumi isumaqatigiissuterput uagut unioqqutinnavianngilarput.
Andreas Uldum isumalluarpoq:
- Ilisimatuussutsikkut uppernarsarneqarsinnaappat, akornutaanavianngitsoq peqqissutsimut avatangiisinullu, imaassinnaavoq Inuit Ataqatigiit eqqarsaatigeqqissinnaassagaaat.
Andreas Uldumilu neriuppoq, naalakkersuisoqatigiit qinigaaffik aappaagu juunimi naatinnagu isumaqatigiilerumaartut.
Kuupik Kleistilli parteeqatini taamanikkussamut kimissinnaassanerai Siumup siulittasuata qularaa:
- Qinigaaffiup uuma iluani alloriaqqissinnaassasut ilimaginngilara, maannakkumummi ataatsimoorfigisinnaasimanngilaat. Ataatsimoorfigalugulu alloriarfigissagunikku, Naalakkersuisut siulittaasoqartariaqarput, taassuminnga aalajangeeqataasinnaasumik tunuliaqutsiisinnaasumillu. Taannalu maannakkut pisinnaassaasoringilara.
Aleqa Hammondilli aatsaaqqinnaq oqarneratut, uranimut naaggaaluinnarneq tununneqassanersoq, Inatsisartuni amerlanerussuteqartut naggaterpiaatigut aalajangertussaavaat. Taasisoqassappallu, Demokraatit ilaasortaatitaat Aleqa Hammondip naatsorsuutigai. Ilimagaami, oqaatigeriikkatit aalajangiusimassagaat, uanilu apeqqummi tapersersuillutik amerlanerussuteqalersitsillutik.
Kisianni Andreas Uldum naapertorlugu, Aleqa Hammond maanna taamannak naatsorsuutigisaqarsinnaangilaq:
- Massakkummi taasisoqassagaluarpat Demokraatini qanoq taasissagaluarpisi?
- Isumaqatigiissuterput naapertorlugu taasissagaluarpugut, Andreas Uldum akivoq.
Folketingimut ilaasortaq IA-meersoq, Sara Olsvig, Danmarkimi aviisimut ullormut saqqummersartumut Informationimut ullumi ima oqarpoq:
- Piviusorsiussagaanni Inatsisartunilu partit inissisimaffii qiviaraanni, uranimut naaggaarluinnarneq siunissami attatiinnassallugu ajornakusuussagunarpoq.
Greenland Mineeral And Energyp qinnuteqaataa, tassungalu atatillugu misissuinernit, Kuannersuarni pilersaarutit peqqinnermut, avatangiisinut inooqatigiinnermut kinguneriumaagaannik uppernaasaatitalinnit, inerniliussassat, naalakkersuisut maanna utaqqivaat. pilersaarut naapertorlugu taakkua ukiup naalernerani piareersimassapput.
