- Neriuppunga tamanna akuersaarneqarsinnaanngitsoq inunnit paasineqassasoq. Oqaaseqarsinnaatitaavugut, kisianni kiffaanngissuseq aamma naleqangaatsiarsinnaavoq. Tamanna atornerlullugu isumaqatiginngisatsinnut toqutsinissamik sioorasaarisinnaanngilagut, Nivi Olsen oqarpoq.Assi: KNR

Demokraatit siulittaasuat eqqartuussivimmiissasoq: Toqumik sioorasaarneqarpunga

Demokraatinit Nivi Olsen ukiup affaata matuma siorna toqumik sioorasaarneqarpoq. Taassuma oqallittarnermi ileqquuleqqasoq ’akuersaarneqarsinnaanngitsoq’ atorunnaarsinniarpaa, taamaammallu eqqartuussivik aqqutiginiarlugu.

Inoqatinut attaveqaatini oqallittarneq sakkortusinnaasarpoq.

Demokraatillu siulittaasorigallagaata, Nivi Olsenip ukioq affaata matuma siorna allagarsiaa siusinnerusumit takusimasaanit sakkortuneruvoq – tassami toqutsinissamik sioorasaarinerummat.

- Angummik aallaaneqarnissamik sioorasaarneqarpunga. Tamanna politiinut unnerluutigivara taamaammat eqqartuussivimmut qanittumi nassuiaateqariartussaannga. Inunnummi allanut taama allattoqarnissaa pissusissamisuunngilaq, Nivi Olsen KNR-imut oqarpoq.

AAMMA ATUARUK Politiit nittartakkatigut sioorasaarisarnerit ilungersornartuutippaat

Inatsississatut siunnersuutip isumaqatigiinniutigineqarneranut atatillugu politikeri Facebookimi quppernermini taama allagarsiaqarpoq.

Taassuma nittartakkatigut nalusaminit taagorneqartarnini sungiusimavaa, sioorasaarneqarnerali sakkortuumik sunniuteqarsimavoq. Nivi Olsen inuiaqatigiinnut akulerusimaniaannarnissaminut sapiissuseqarniartariaqarsimavoq.

Nivi Olsenip sioorasaarisimasutut unnerluutigisimasani pillugu eqqartuussivimmi sapaatip-akunnerata tulliani nassuiaateqassaaq.

- Pisut nuanniitsut qaangerusunnarnerusarput. Puigunngisaannassavara, ksiianni qaangeriartulerpara maannalu eqqartuussivik sumik tamanik qaqitseqqilersutut ippoq. Kukkusumilli iliorsorineqartumut unitsitsiniarluni taamaaliortoqartariaqarpoq, Nivi Olsen oqarpoq.

Ajornartorsiuterujussuusoq

Nivi Olsenip misigisimasaa asseqanngitsuunngilaq. Kalaallimmi politikerit qassiiusut nakkarsagaaneq saassutarineqarnerlu pillugit siusinnerusukkut saqqummiussaqarnikuupput.

Demokraatit siulittaasorisimasaat, Niels Thomsen siorna novembarimi politikkimiit tunuarpoq. Taassuma oqarnera naapertorlugu inummut timikkullu saassussinerit qassiiusut pissutaapput.

Doris J. Jensenip (S) politikkikkut suliaqarnera pissutigalugu illuanut serlersaarinerit taassumalu ilaqutaanut qaninnerpaamut timikkut saassussineq piffissami tassani aamma nalunaarutigai.

Kalaallit Nunaanni Politiit unnerluussisussaatitaasuata, Morten Nielsenip nittartakkatigut sioorasaarinerit ilungersunartorujussuarmit politiinit isiginiarneqartartut KNR-imut taamani oqaatigaa. Pillaatigineqartorlu politikerimut pisortaniluunniit arlaanni atorfeqartumut sammitillugu immikkut ittumik sakkortunerusinnaanerarlugu.

Nivi Olsenip suliaq imminut tunngasoq oqallittarnermi ileqquusumi ajornartorsiutaangaatsiartumut ilaanissaa qularutiginngilaa. Pingaartumik inoqatinut attaveqatigiiffik Facebook aqqutigalugu oqallinnermi.

- Ajornartorsiutaangaatsiarpoq, iliuuseqanngikkutta taava arlaanni sioorasaarinerit arlaatigut iliuuserineqarsinnaanerat annilaangatigaara. Maannakkut iliuuseqassaagut tamannalu unitsillugu.

- Neriuppunga tamanna akuersaarneqarsinnaanngitsoq inunnit paasineqassasoq. Oqaaseqarsinnaatitaavugut, kisianni kiffaanngissuseq aamma naleqangaatsiarsinnaavoq. Tamanna atornerlullugu isumaqatiginngisatsinnut toqutsinissamik sioorasaarisinnaanngilagut, Nivi Olsen oqarpoq.

Maajip ulluisa 26-anni sisamanngornermi eqqartuussisoqassaaq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat