Demokraatit: S-61-it atorneqarlik
Qaarsuarsunni Qaanaamilu timmisartoqarfiit matullugit aningaasat qulimiguulinnut atorneqalerlik.
Demokraatit taama siunnersuuteqarput, inatsisartullu ukiaanerani ataatsimiinneranni sammineqartunut ilaassalluni.
Qaarsuarsunni Qaanaamilu timmisartoqarfiit amigartooruteqarfiupput, siunnersuusiortorlu Marie Fleischer naapertorlugu timmisartoqarfiit taakku marluk innuttaasunut iluaqutaasimanngillat, naak aallaqqaammut tamanna siunniunneqaraluartoq.
- Kukkussutigut nunatsinni ilinniarfigisariaqarpavut. Mittarfeqarfiit taakku naapertuutinngitsumik ingerlanneqarnerat akueriinnarsinnaanngilarput, Uummannammi sulluani takornariaqartitsineq innarlerneqarluinnarsimammat, Marie Fleischer aalajangiivigisassatut siunnersuummini taama tunngavilersorpoq.
Qaarsuarsuit aamma Qaanaaq qulimiguulimmik S-61-imik tikinneqartalernissaat siunnersuutigineqarpoq, tassa Uummannamiit Pituffimmiillu tikinneqartalernissaat siunnersuutigineqarami.
Taamaaliornikkut Qeqertarsuaq Qasigiannguillu qulimiguulinnik tikinneqaqqittalissagaluartut Demokraatinit aamma oqaatigineqarpoq.