Demokraatit Royal Greenlandilu
Demokraatit isumaliutigaat Royal Greenlandip siulersuisui qinnuigissanerlugit naalakkersuisut suliffissuullu piffissami kingullermi isumaqatigiinngissutaat paasissutissiissutigineqassasut suliffissuup siunissami namminersortunngorsarneqarnissaanut periusissat eqqarsaatigalugit.
Atassutip Demokraatillu naalakkersuisut Johan Lund Olsenip Jørgen Wæver Johansenillu Inatsisartuni sapaatip akunnera kingulleq Royal Greenland pillugu nassuiaataat amigaraat.
Naalakkersuisut siulittaasuata Hans Enoksenip kissaatigaa Royal Greenlandip eqqissilluni suliassani suliarissagai namminersortunngorsarneqarnissamillu suliffissuup Alfred Bergimik isumaqatigiissutigisimasaanik takunnikkusuttut namminneerlutik suliffissuaq saaffigisariaqaraat.
Paasissutissanik amerlanerusunik naalakkersuisut pissarsiniarusunnginnermikkut suut tamaasa matoortorpaat, eqqartorneqartuni eqqunngitsumik oqaluttoqarpoq paasissutissalli pitinnagit oqarsinnaanngilagut kina eqqunngitsumik oqalunnersoq, demokraatinit Per Skaaning oqarpoq.