Demokraatit qineqqusaarnissaat saqqummiunneqarpoq
Demokraatit inatsisartunut qinigassanngortitatik qineqqusaarutissatillu ullumi saqqummiuppaat.
Sinerissami immikkoortoqarfinnit 13-iusunit katillutik 45-t qinigassanngortipput.
Demokraatit ikinnerpaamik arfinilinnik Inatsissartunut isertitaqarnissaat neriuutigigini siulittaasuat Per Berthelsen oqarpoq:
- Qinersinermi Demokraatit imminnut iluatsittutut nalilissapput arfinilinnik ilaasortaatitaqalerunik, kisianni neriuutigeqaarput suli amerlanerusut iserumaartut, qularnanngimmammi arfineq pingasut anguneqarsinnaappata naalakkersuisulioqatigiinnissaq ammaanneqassammat periarfissallu amerlanerulerlutik.
Demokraatit qineqqusaarutinik tallimanik pingaaruteqartunik qulequtaqarlutik sassarniarput. Siullermik:
- Meeqqat sumiginnarneqartut sullinneqarnerat nukittsorsarneqassasoq Demokraatinit pingaartinneqarmat meeqqat angajoqqaanit sumiginnagaasimasut inuiaqatigiinnit sumiginnagaassanngimmata.
Aapaattut:
- Meerataarnermut atatillugu sulinngiffeqartitaasinnaanerup sivitsorneqarnissaa. Nunatsinni isumaginninnermi ajornartorsiuterpassuit takusartakkagut aallaavigalugit pinngitsoorneqarsinnaanngilaq meeqqat nunarsuarmi pinngoqqaarnerminiit toqqissisimasumik ineriakkiartornissaa. Nunarsuaq tamakkerlugu peqqinnissamik ingerlatsiviusoq WHO inassuteqarpoq minnerpaaffimmik taassumalu anguniarneqarnissaa Demokraatit sulissutigissavaat.
Pingajuattut Atuarfitsialaap soraarummeersinneqarnissaa Demokraatit piumasariniarpaat pissutsit piviusut Atuarfitsialamillu oqalunneq avissaangammata, tamannalu pillugu International Friskoleqalernissaa Demokraatit sulissugineqassaaq.
Sisamaattut:
- Inissaqarniarnerup pisariaqartinneqartumut inorsarnerujussua nungusartariaqartoq suliniutiginiarparput aammalu ullumikkut inissiat ilaasa piitsut najugaqarfiisut isikkoqarnerat qimaterniarparput.
Sulissutigisassat tallimaat naalakkersuisuinut tunngavoq:
- Ilassinninnermut aningaasaliissutigineqartartut aamma naalakkersuisunut inissianut aaqqissuinerit sukaterneqarnissaat piumasarissavarput uagummi i sumaqarpugut naalakkersuisuuneq tunissutisiaassanngitsoq kisiannili sulliviussasoq.
Demokraatit sassartitaanni 45-sunit arnat quliupput angutillu 35-iullutik. Demokraatinit kommuneqarfinni 13.ineersunik sassartitaqassapput, kommuneqarfinnilu sisamaneersunik tassalu Narsami, Paamiuni, Aasiaanni Illoqqortoormiunilu sassartitaqanngillat.
