Demokraatit qilalukkat pillugit isumaat assigiinngitsut

Demokraatit partiianni qilalukkat pillugit assigiinngitsunik isumaqartoqarpoq. Palle Christiansen

Demokraatit sinnerlugit Inatsisartuni ilaasortaq ullaaq radioaviisimut oqarpoq naalakkersuisut avannaani kommuneqarfiit qilalugarniarfiusartut pisassiisoqaqqinnissaanik qinnuteqarnerannut akuerineqassappata, tamanna piujuaannartitsinissamik tunngaveqarluni piniartarnissamik isumamut assortuinerussasoq. Tamatumunnga Qasigiannguani Demokraateqataa Mads Peter Grønvoldt isumaqataanngilaq. Mads Peter Grønvold ima oqarpoq:

- Qilalukkat pillugit maannakkut ilisimasat killeqartorujussuupput, tamanna isumaqataannginninnut tunngavigaara. Atuisunit oqaatigineqartarpoq qilalukkat aamma taama ikitsiginngitsut. Tassa kisitseriaatsit allanngortinneqarluarpata qilalukkat amerlassusai maannamut nalunaarsorneqarsimasut amerlassusaannt amerlanerit nalunaarsorneqassaluarput.

Mads Peter Grønvold aamma oqarpoq qilalukkat ukiup ingerlanerani piffissani aalajangersimasuni takkuttarfeqartut.

- Kisitseriaatsit Naalakkersuinikkut pitsanngorsaavigineqartuuppata, paatsooqatigiittarnerit nunanullu allanut tusarniitsumik kinguneqartitsisinnaasut pingisoorneqartassagaluarput.

Demokraatit sinnerlugit Inatsisartuni ilaasortaq Palle Christiansen oqaaseqartinniaraluaratsigu iluatsinngitsorparput.

- Naluara taanna qanoq suleriaaseqarnersoq, taamaattumik oqaannarsinnaanngilanga tunuliaqutit erserissumik tusarniarneqarsimanersut. Mads Peter Grønvold oqarpoq oqaatigaali avannaani kommuneqarfiit Demokraateqarfiusut tusarniarneqarsimanngitsut.

- Isumaqarpunga tulluarussagaluartoq siunissami kommuneqarfiit tusarniarneqaqqaartalersuuppata aalajangerniarnerit tamaattut avammut aninneqartinagit.

Demokraatit qilalukkat pillugit isummernerata assortuuttoqartoq Mads Peter Grønvold isumaqarpoq.

Avannaani qilalugartassat ilaqqinneqarnissaat nammineq tapersersorini oqarpoq.