Demokraatit Qaqortumi mittarfiliortoqarnissaa kissaatigaat

Akiitsunut Aningaasaliinissamut periusissami, Naalakkersuisunit 2012-imi upernaakkut ataatsimiinnermi saqqummiunneqartumi pingaarnersiuinissami aamma ersarittupilussuuvoq. Tassanimi naqissuserneqarpoq Qaqortumi, inissisimaffimmi 2-mi, mittarfiliornissamut Narsarsuup matuneqarnissaa ilanngullugu business caseliortoqassasoq.

-Naluara sooq partiit allat mittarfissaq akerlilersorneraat, kisianni qularnaatsumik ilisimasarput tassaavoq Qaqortumi mittarfik imminut akilersinnaassasoq isumassarsiatsialaasorlu. Qinersinerup kingorna naalakkersuisoqaatigiinnissaq pillugu isumaqatigiinniarnernut peqataassagutta siunnersuut unarpiaq ilanngunniarlugu eqqarsaatigaarput. Mittarfiup taassuma aallartisarneqarnissaa pingaartittupilussuuarput, Jens B. Frederiksen knr.gl-imut oqarpoq.

Demokraatittaaq isumaqarput najukkami pissutsinik ilisimasaqarnerpaajusut isumaannik naalaarnissaq pingaaruteqartoq, tassalu Kommune Kujallermi kommunalbestyrelsi. Tassani amerlanerussuteqarluartut Qaqortumi mittarfiliornissamik eqqarsaat ilalernartippaat.

-Kujataani angallannikkut pissutsit maannakkorpiaq pitsaaqqajanngillat. Partiit Aningaasaqarnermut ataatsimiititaliami ilaasortaatitaqartut ilaat pingasut, IA, Atassut Siumullu, naalakkersuisut susassaqarfimmi periusissaat akerlilerpaat, tamatumalu malitsigisaanik Kujataani ullumikkut qulimiguullit pingasut angalapput Qaqortumiillu Narsarsuarmut ilaasunik assartuisuullutik. Ilaasut 80 %-iisa missaat Qaqortumeersuupput, taamaammat Qaqortumi mittarfiliortoqarnissaanik aalajangiisoqarsinnaannginnera paasisassaanngivippoq. Kingullermik qinersinermi anguniagaraarput, aamma Inatsisartuni nutaani minnerpaamilluunniit mittarfiliortoqarnissaa pillugu tunngaviusumik aalajangiisoqarnissaa ilungersuutigissavarput, Jens B. Frederiksen neriorsuivoq.