Demokraatit: Qallunaat nunarput pillugu qaammaassaqarnerulissapput

Demokraatit folketingimut juunip 18-ni qinersinermut qineqqusaartitassatik ullup qeqqanut allaffeqarfimminni saqqummiuppaat.

Taakkuli tassaapput, Randi Evaldsen Inatsisartuni ilaasortaq, Poul Hansen Kommuneqarfik Sermersuumik kommunalbestyrelseni ilaasortaq, Aputsiaq Olsen Jonathansen KNI A/S-mi allaffimmiutut ilinniartoq aammalu Rasmus Dalsgaard Andersen Tele Greenlandimi IT-lerinermut suliaqartartoq.

Qineqqusaartullu anguniagassaat pingaarnerit siulittaasup Andreas Uldummip saqqummiuppai.

- Pingaarnerpaarpaajuaannarpoq nunatta oqaasissaqarnera, kiisalu suleqatikkuminartuunissaa taanna sulissutigissagipput. Aamma qallunaat qaammaassaqarnerulernissaat nunarput pillugu, Andreas Uldum oqarpoq.

Partii Naleqqap qineqqusaartitassami kikkuuneri saqqummiunnissaat partiini kisiartaallutik suli saqqummiutinngilaat. Partii Naleraq sinnerlugu Inatsisartuni ilaasortaq, Per Rosing Petersen KNR-imut ullaap tungaa oqarpoq, kikkut qineqqusaassanersut tallimanngorpat juunip tallimaani saqqummiusinnaassallugit.

Maannakkumullu Partii Inuit qineqqusaartitsissanersoq suli qulakkeerneqanngilaq.