Demokraatit: Qaasuitsup Kommuniata aningaasaqarnera misissorneqartariaqarpoq
- Oqarluaannarluni, Qaasuitsup Kommuniani aningaasaqarneq ajorluinnartoq nalornissutaajunnaarpoq; paaserusunnarsivorlu qanoq ajortigisumik inissisimasoqarnersoq, Ane Lone Bagger oqarpoq, nangillunilu:
Aningaasaqarnerput ilorraap tungaanut saatinniarlugu sulissuteqarnitta aallartinnginnerani qanoq ajortigisumik inissisimasoqarnersoq qulaajartariaqarparput.
Aningaasaqarnerup ingerlalluannginneranut Qaasuitsup Kommuniani borgmesteri, Jess Svane, Ane Lone Baggerip pisuutippaa.
- Demokraatiniit isumaqarpugut, Jess Svanep akisussaaffini toqqissisimanartumik ingerlassimanngikkaa. Ataasiarnanga misigisarpara borgmesterip aningaasaqarnitsinnik paasissutissiisarnera amigartoq, Ane Lone Bagger oqarpoq.
Qaasuitsup Kommuniata aningaasaqarnerata misissuivigineqarnissaata saniatigut kommunip aalajangiisarnerisa ammanerusumik saqqummiunneqartarnissaat Ane Lone Baggerip siunnersuutigaa.
