Demokraatit: Politikerit ikiuuttariaqarput
Namminersornerullutik Oqartussat Sisimiullu kommuniat Rita Christensenimik ilaqutaanillu ikiuipallaqqullugit Demokraatinit kaammattorneqarput. Rita-p, ilinniarnerminut atatillugu USA-miittup, Idahomi sisorartilluni qitini arlalitsigut napimmagu, Kalaallit Nunaanniit ikiorneqaratik angutaata oqaatigaa.
apriilip 30-at 2008 05:39
- Politikerit nuimasut timmisartuunneqarlutik katsorsartikkiartortut takusareerpavut, kiffartuunneqarneq taamaattoq Rita Christensenimut aamma atuutsinneqartariaqarpoq, Demokraatiniit Astrid Fleischer Rex Palle Christiansenilu tusagassiuutinut nalunaarumminni allapput.
Rita Christensen Kalaallit Nunaanniit sinniisutullusooq takutitsilluarnikuuvoq, ilaqutariillu inuiaqatigiinnit maanna ikiorneqanngilluinnarnerat akuerineqarsinnaanngilaq, pisortallu piaartumik aaqqiivigisariaqarpaat. Rita Christensen USA-miit Danmarkimut timmisartuunneqartariaqarpoq, katsorsarneqarneralu tuaviornerpaamik aallartinneqarluni, Demokraatit allapput.
Rita Christensen Idahomi napparsimmavimmi maannakkut uninngavoq.
