Assi: KNR

Demokraatit: Politiinik immikkut ittumik suliaqartussanik pilersitsisoqarniarnera naammanngilaq

Tasiilami politiinik maannakkumiit amerlanerujussuarnik pisiariaqartitsisoqartoq, Inatsisartuni ilaasortaq Malene Vahl Rasmussen isumaqarpoq.

Politiinik kinguaassiuutitigut atornerluinermik pitsaaliuinermik immikkut ittumik suliaqartussanik pilersitsisoqarniarpoq. 

Danskit inatsisinik atuutsitsinermut ministeriat, Nick Hækkerup, tamatumunnga aningaasaliissutissanik ujarlerniarpoq. Isumaginninnermut naalakkersuisoq Martha Abelsen danskillu isumaginninnermut ministeriat Astrid Krag (S) assinganik tallimanngormat siunnersuuteqarput.

Taakkuninngali pilersitsisoqarniarnera naammanngilluinnartoq, Malene Vahl Demokraatineersoq isumaqarpoq. Taanna Inatsisartut Ilaqutariinnermut Peqqissutsimullu Ataatsimiititaliaanni siulittaasuuvoq. 

AAMMA ATUARUK Siunnersuut: Danskit naalakkersuisui nunatsinni politiinut iluaqusiilertut

- Taakkuninnga pilersitsisoqarniarnera naammanngilaq. Pissusiviusummi malillugit naammanngilluinnarpoq, Malene Vahl Rasmussen  tusagassiutinut nalunaarumminni allappoq. 

- Ataatsimiitsitaliamut peqataallunga Tasiilameeqqammerpunga, paasisaqarfigilluarlugulu, Tasiilami politiit qanoq artorsartigisut. Politeeqarfik atorfilittatigut amigaateqaqaaq, sulisullu akuerineqarsinnaasut sinnerlugit nukersorput.

Sulerulunneruleraluttuinnartut

Tasiilami politiit sulerulunneruleraluttuinnarnerat Malene Vahl Rasmussenip oqarnera naapertorlugu kinguaassiuutitigut killissamik qaangiiffigitissimallutik suliassanngortitsisut amerlerujussuarsimanerannik peqquteqarpoq. Tamanna DR-ip piviusulersaarutaata ”Byen, hvor børn forsvinder” siorna maajimi allakaatereerneratigut pisoq, taanna oqarpoq. 

AAMMA ATUARUK Ataatsimut isigalugu: Meeqqanut inuusuttunullu atugarliortunut atatillugu innersuussutit 16-it

- Piviusulersaarut kalaallit danskillu immikkut ittumik iliuuseqarnerannut peqqutaaqataavoq, tamannalu politiit ulapinnerulernerannik kinguneqarpoq. Danskilli inatsisinik atuutsitsinermut ministeriata tamanna ajoraluartumik paasisimarpasinngilaa, Malene Vahl Rasmussen oqarpoq.

Tasiilamilu politiit ulapittorujussuunerannik oqarneq Kalaallit Nunaata politiivisa isumaqatigaat.

- Politeeqarfinni suleqatikka ulapittorujussuusut pillugu isumaqataavunga, politimesteri Bjørn Tegner Bay oqarpoq.

- Ingammik inunnut ulorianaatilimmik pinerlunnernik, tassalu kinguaassiuutitigut pinerlunnernik, nakuusernernik toqutsinernillu nalunaarutiginninnerit amerlasoorujussuunerat artorsaatigaat. Tamanna politeeqarfinnut ikiuisussanik pisariaqaleraangat nassissinikkut aaqqinniarsarisarparput.

Tasiilami nunattalu sinnerani politeeqarfinni politiitut atorfillit qassiunersut politiit KNR-imut paasissutissiissutigerusunngilaat. 

Tasiilamili politiinik amerlanerusunik atorfinitsitsisoqartariaqartoq, Malene Vahl Rasmussen isumaqarpoq. 

Politiit amigartut 

- Nuummi inissinneqassagunartunik politiinik immikkut ittumik suliaqartussanik pilersitsisoqarpat naammanngilaq. Paatsuussanngilassinga; kinguaassiuutitigut atornerluisarnerup pinaveersaartinnissaa kisiat pigaanni isumassarsiaq ajunngeqaaq – kisiannili taannaannaasariaqanngilaq. Politeeqarfinnili atorfilittatigut amigaateqarnerup ajornartorsiutaanerujussua puigorneqassanngilaq, Malene Vahl Rasmussen oqarpoq.

- Taamaattummik Nick Hækkerupimut ima kajumissaaruteqarpunga; Iliuuseriniakkat naammanngilaq. Politiit immikkut ittumik immikkoortortamik pilersitsinikkut nipangersaasiinnarsinnaanngilluinnarpatit. Illoqarfinni politiinik amerlanerusunik pisariaqartitsisoqarpoq, aammalu illit inatsisinik atuutsitsinermut ministeritut akisussaasutit tamanna isumagisariaqarpat.

Politimersterilu Bjørn Tegner Bay politiinik immikkut suliaqartussanik pilersitsisoqarniarneranut tupaallanngitsumik neriulluarpoq.

- Assersuutigalugu videokkut killisiuisarlutillu meeqqanut atornerluinermut sulianik misissuisartoqarpugut. Sulianut taamaattunut nutaamik immikkoortortaqarfeqalissappat, tamatuma Tasiilami suleqatitsinnut aamma oqilisaataasorujussooqataanissaa qularnanngilaq, taanna oqarpoq.

Isummersuutit

inatsisartut-sal-sep2019.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat