Demokraatit: Peter Borgip kukkunini nassuerutigaa

- Kukkuvunga.

Politikerit taama oqariataarsinnaanerat ulluinnarni tusakulasuunngilarput. Kisianni tassa taama oqarpoq Nanortalimmiu Demokraatineersoq Peter Borg.

Peter Borg Nanortallip kommuniani borgmesterissat aappaattut inissisimagaluarpoq. Ippassarlu radioaviisimi oqarpoq, IA-p Siumullu tallimanngormat isumaqatigiissutaat unioqqutitsinerusoq. Isumaqatigiissummimi pineqarmat, Tage Frederiksen taarserlugu Kristine Raahauge borgmesterinngussasoq.

Peter Borg isumaqarneraraluarpoq, maanna borgmesterissatut siullertut qinigaasimasoq IA-meersoq Debora Kleist borgmesterinngortariaqaraluartoq, namminerlu borgmesterissatut siullertut inissinneqartariaqarluni.

Malittarisassalli taamaanngimmata kukkunini nalunaarutigaa.

Nanortalimmi kommunalbestyrelse borgmesterissaminnik aqagu qinersissapput.

- Maanna paasivara kukkullunga oqarsimallunga, malittarisassammi malittariaqarpavut, Peter Borg oqarpoq.