Demokraatit peqquserluttoqarneranik nalunaarusiaq saqqummiutequaat

Demokraatit piumasaraat Inatsisinik unioqqutitsilluni aalisartoqarnera pillugu nalunaarusiaq piaarnerpaamik tamanut saqqummiunneqartariaqartoq.

- Hans Enoksenip, piumasaannarminik oqalunnera tassani takoqqipparput, kingumullu takoqqipparputtaaq Naalakkersuisoqartugut iluamik iliuuseqarsinnaanngitsumik, taama oqarpoq Demokraatit siulittaasuat Per Berthelsen.

Taanna aperaarput, ippassaq radioaviisimi Hans Enoksen oqarsimasoq Inatsisinik unioqqutitsilluni aalisartoqarneranik ajornartorsiut nunatsinni innuttaasut tamarmik ilisimaarimmassuk Demokraatit aamma ilisimaarineraat.

- Naamerluinnaq, kisianni taamaattoqarnera pasitsaannikuuarput qangali, tusatsiakkat aallaavigalugit paasisarparput aamma pisassiissutit kingumoortumik atuuttussanngorlugit aamma tunniunneqartarsimasut, oqarpoq. Nangipporlu:

- Takujuakkavut Naalakkersuisut ingerlatsinerannut tunngasut aallaavigalugit pasitsaassaqartarpugut Naalakkersuisut ingerlatsinerannik ajorluinnartumik ingerlasoqartoq. Kingumullu uppernarsineqaqqippoq nunatsinnut aningaasatigut annaasaqaataaqisumik pisoqartoraasiit, Per Berthelsen oqarpoq.

Apereqqipparput, pasitsaassisimagunik sooq iliuuseqarniarsimannginnersut.

- Oqaasiinnartigut tusakkat soriarsinnaanngilagut, una pisoq nalunaarusiortitsinerlu aallaavigalugit paasineqarpoq, tusatsiakkat aallaavigalugit ingerlaniaraluarutta ikkarlillutalu unittussaavugut, oqarpoq.

Qalleqqissaavorlu maanna misissuisitsinissamut tunngavissaqalersoq.

Nangippoq, oqaluttarfimmiit uparuaasarsimaqalutik aalisarnikkut ingerlatsinerup equngasoqarnera apeqqusertarsimagitsik ilumut tatiginartumik ingerlasoqavinnersoq.

- Misissuisitsinerit maanna paasisagut inuiaqatigiinnut saqqummiunneqartariaqalerput, oqarpoq.

Taamatuttaaq Per Berthelsenip kaammattuutigaa Inatsisinik unioqqutitsilluni aalisartoqarneranik nalunaarusiap isertuunneqarsimasup piaarnerpaamik saqqummiunneqarnissaa.

- uagut nammineerluta piumasaqassaagut, partiitut inatsisartuni ilaasortaatitaqartutut paasissutissat sukumiisut tamarluinnaasa iternga tikillugu pissarsiariumallugit, Per Berthelsen oqarpoq.

Taanna Naalakkersuisunut aammalu Hans Enoksenimut kaammattuivoq nalunaarusiaq taanna piaarnerpaamik tamanut atuarneqarsinnaanngorlugu saqqummiunneqassasoq.