Demokraatit paasissutissanik perusupput
Naalakkersuisuni ilaasortap Doris Jakobsenip Inatsisartut ataatsimiinnerat qimaannarlugu Issittormiut unammiuaarnerannut ulluni arfineq pingasuni angalasimanera, ataatsimiinnermi ullormut oqaluuserisassanik arlalinnik allanngortitsisariaqarsimanermik kinguneqartoq pillugu Demokraatit naalakkersuisut siulittaasuannut allakkatigut apeqquteqaateqarput.
Naalakkersuisut angalasarnissaannut pilersaarutit Inatsisartut ataatsimiinnerannut naleqqersuukkaanni amigaateqarsorinartut Demokraatit isumaqarput.
- Isumaqarpunga isumaqatigiissutigisinnaagipput naammaginanngitsuusoq Naalakkersuisut Inatsisartuni sulinermik minnerutitsillutik annertunerusumik minnerusulluunniit allami ilassinninnernik pingaartitsinerussappata, Inatsisartuni ilaasortaq Demokraatineersoq Palle Christiansen uparuaateqarluni taama allappoq.
Tamanna pillugu Demokraatit paasissutissanik assigiinngitsunik Naalakkersuisut siulittaasuannut Hans Enoksen-imut piumasaqarput.
Naalakkersuisuni ilaasortap atorfilittaasalu Alaskamut angalasimasut pisortatigoortumik angalanissamut pilersaarutaat Demokraatit perusupaat. Tamatuma saniatigut Doris Jakobsenip angalanermini sunik suliaqarsimaneranik tassa angalanermini ataatsimeeqateqarsimanersoq pisortatigoortumillu angalanermini pisussaaffimminik naammassinnissimanersoq kiisalu atorfilittaasa kikkut ilaasimanerannik angalanermullu atatillugu aningaasartuutaasimasunut nalunaarsuiffik Demokraatinit perusunneqarpoq.
Demokraatit paasissutissanik piumaqasarnermik saniatigut aamma qulinik apeqquteqaateqarput. Doris Jakobsenip Issittormiut unammiuaarnerata ingerlanneqarnera tamakkerlugu ilaaniarluni aalajangersimaneranut Hans Enoksen Naalakkersuisut siulittaasuattut pisariaqartitsillunilu pissutissaqarsorinnissimanersoq Demokraatinit ilaatigut paaserusunneqarpoq.
