Jens Frederik Nielsen Demokraatit siulittaasortaaraat
Taamaalilluni Demokraatit siulittaasorigallagaata Nivi Olsenip siulittaasutut suliassaq Jens Frederik Nielsenimut tunniussinnaanngorpaa.
28-nik ukiulik Jens Frederik Nielsen Demokraatit siulittaasussaattut kisiartaalluni sassarami, siulittaasutut qinigaavoq:
- Misigissuseq nuannerpoq, misigisimavunga piareersimallunga. Suliassat annertuut tigulerpakka. Parteeq ingerlalluartoq, piffissamili sivisuumik unamminartumik inissisimareersoq akisussaaffik tigulerpara. Suliassallu aallartinnissaat qilanaaraakka, Demokraatit siulittaasortaavat, Jens Frederik Nielsen taama oqarpoq.
Partiimi siulittaasunngornermi saniatigut Jens Frederik Nielsen Inuussutissarsiornermut aatsitassanullu naalakkersuisunngoqqammerpoq.
- Politikerput pingaarnerpaajuaannassaaq, tassa innuttaasunut sammisoq, kiffaanngissusermik pingaartitsisoq, meeqqat atuarfianni ukkatarinnittoq, akileraarutinik appaaniarluni sukataaruteqartoq. Maannakkullu siumut ingerlaniartoq.
Nunanut allanut nukissiuuteqarnermullu naalakkersuisoq, Steen Lynge, Siulittaasumut tulersortinngorpoq, politikkimut tunngasunik suliaqartuussalluni.
Demokraatini siulittaasuunerit nutaat:
Siulittaasoq: Jens-Frederik Nielsen
Politikkimi siulittaasup tullia: Steen Lynge
Aaqqissuussaanikkut siulittaasup tullia: Nivi Olsen
Aningaaserisoq: Malene Vahl Rasmussen
Ilaasortaq: Anna Wangenheim
Ilaasortaq: Lena Ravn Davidsen
Ilaasortaq: Nadia Olsen
Sinniisussaq siulleq: Simigaq Heilmann
Sinniisussaq aappaat: Justus Hansen
Sinniisussaq pingajuat: Andrie Sørensen
Nivi Olsen Demokraatit siulersuisuini ilaasortaaginnarpoq, siulittaasup tulliatut aamma inissikkami, aaqqisuussaanerlu immikut suliarissallugu.
Demokraatit ataatsimeersuarnerat Inatsisartuni partiit gangianni qarasaasiatigut ingerlanneqarpoq.
Partiip siulittaasoqarniarnera ajornakusoortoq
Siulittaasuusimasoq Niels Thomsen uippakajaarluni 2019-imi marsimi sulinngiffeqalermalli Demokraatit utaqqiisaasumik siulittaasoqalerput.
Niels Thomsen Inatsisartunut 2018-imi qinersinermi qinersisikinngitsoq, siorna marsip qaammataani Inatsisartunit sulinngiffeqalerpoq uippakajaarnini pissutigalugu.
Sulinngiffeqarnerani Randi Vestergaard Evaldsen siulittaasuugallarpoq, Nivi Olsenilu aaqqissuussaanermut akisussaalluni siulittaasumut tullersortaavoq.
Qaammatilli sisamat qaangiummata, tassa siorna juulip qaammataani Randi Vestergaard Evaldsen brugsenimi pisiortornermut pisortanngorami politikimit tunuarpoq Nivi Olsenilu siulittaasuugallartunngorpoq.
Naalakkersuisooqatigiit nutaat
Demokraatit naalakkersuisooqatigiinnut sivisuumik ikorfartortaareerlutik maaji naalersoq naalakkersuisooqatigiinnut ilanngupput.
Naalakkersuisooqatigiilersullu tassaapput Demokraatit, Siumut aamma Nunatta Qitornai.
Naalakkersuisooqatigiit nutaat coronap ajornartoortitsinerani kivitseqataassasut, naalakkersuisut siulittaasuata Kim Kielsenip naalakkersuisooqatigiit nutaat saqqummiukkamigit oqarpoq.
Anna Wangenheim, peqqissutsimut, Steen Lynge nunanut allanut tunngasunut nukissiuuteqarnermullu taavalu Jens Frederik Nielsen inuussutissarsiornermut aatsitassaqarnermullu naalakkersuisunngorluni .