Demokraatit nutaamik ataqatigiissaarisortaarput
Demokraatit aaqqissuussaanerminni siulittaasuata tullia tamakkiisumik atuutileqqippoq. Ippassaq ataatsimeersuarnermi inatsisartunut ilaasortap Jens B. Frederiksenip immikkoortortaqarfiit ataqatigiittumik attaveqarfigineqartarnissaannik akisussaaffeqarniarluni akuersivoq.
Partiimi siulittaasoq Per Berthelsen sivisungaatsiartumik taamatut akisussaaffeqarsimavoq.
- Sivisuumik nakkutigineqarsimanngitsoq maanna nakkutigineqalerpat pitsanngoriartoqassaaq, partiimi siulittaasussarsiornermi unammillerteqarani siulittaasutut toqqarneqaqqittoq Per Berthelsen taama oqarpoq.
Demokraatit siulittaasuata tullia Palle Christiansen, naalakkersuineq pillugu oqaaseqartartuutinneqartutut aamma toqqarneqaqqippoq.
Siulersuisuunerni nutaatut toqqarneqarput inatsisartuni ilaasortaatitaasoq Marie Fleischer, Ilulissaneersoq. Taassuma taarserpaa inatsisartuni ilaasortaqatini Astrid Fleischer Rex.
