Demokraatit: Niuernermut Ilinniarfik Nuummiittoq nuunneqassanngilaq
Niuernermik Ilinniarfiit Qaqortumi kattutsinneqassanngillat, taama isumaqarpoq Demokraatit sinnerlugit Inatsisartunut ilaasortaq, Anda Uldum. Taanna tusagassiutinut nalunaarummini ilaatigut allalluni, ilinniarfiit ingerlalluartut Nuummiit piiarniarlugit Siumup politikkikkut anginiakkani maanna piviusunngortikkiartuaalerai.
Andreas Uldumip tusagassiutinut taama nalunaaruteqarnermini tunngavilersuutigaa, Kommuni Kujallermi borgmesterip, Jørgen Wæver Johansenip, Siumut siunnersuutigimmagu, Niuernermik Ilinniarfiit Qaqortumi ataatsimoortinneqassasut.
- Demokraatinit Siumukkormiut qinnuigissavagut eqqarsarluarnerulaaqqullugit. Sooq niuernermut ilinniarfik ingerlalluartoq illoqarfiit pingaarnersaanniit nuunneqassava? Sooq siulersuisut, ilinniartitsisut, ilinniartut allallu soqutigisaqaqatigiit tusarniaqqaarneqassanngillat?
Demokraatit Inatsisartunut ilaasortaat Anda Uldum tusagassiutinut allagaqarnermini aperivoq.
Niuernermik Ilinniarfiit siulersuisuunerini siulittaasup, Bjørn Holmip Qanoruumut oktobarip aqqarnganni oqaatigaa, niuernermik ilinniarfiit ataatsimoortinneqarnissaat isumaqatiginagu oqarluni ilinniarfiit siunertaat assigiinngitsuummata tamanna isumaqatigisinnaannginnerarlugu.
- Qaqortumi Niuernermut Ilinniarfiup pikkoriffigaat, pisiniarfinni sulisussanik ilinniartitsineq Nuummi pikkoriffigineqarlutik ilinniarfinnut ingerlaqqiffiusussanut ilinniartitsineq.
Niuernermik Ilinniarfiit siulersuisuini siulittaasoq Bjørn Holm taama Qanoruumut oqarpoq.
Niuernermik Ilinniarfiit ataatsimoortinneqarnissaanik eqqarsaat, Ilinniartitaanermut Naalakkersuisup, Nick Nielsenip isumaqatigisinnaallugu oqaatigaa.
- Niuernermik Ilinniarfiit ataatsimoortinneqarnissaannik soqutiginninneq nuannaarutigalugu, niuernermik ilinniagaqarnissamik kissaateqartut pitsaanerpaamik atugassaqartinneqarnissaat pillugu suliamut attuumassuteqartut oqaloqatigissavakka, Ilinniartitaanermut Naalakkersuisoq tusagassiutinut nalunaarummini oktobarip 14-anni allappoq.
Andreas Uldumip tusagassiutinut nalunaarummini eqqaamaqquaa, ilinniarfiit assigiinngitsut ataatsimoortinneqannginneraanni qularnaarneqassammat, ilinniartitsisussaqarnissaq taamatullu ilinniartunut sulisunullu inissaqartitsinissaq. Ilinniartullu sumiiffimmi ataasiakkaani ilinniarusussuseqarnissaat aamma eqqarsaatigineqartariaqartoq, Andreas Uldumip tusagassiutinut nalunaarummini allaaseraa.
Andreas Uldum aamma allappoq, neriuutigalugu Kommuni Kujallermi borgmesterip, Jørgen Wæver Johansenip siunnersuutigisani tunuartikkumaara isumaqarami Niuernermik Ilinniarfik Nuummiittoq nuunneqartariaqanngitsoq.
