- Una pineqartoq, isumaqanngilanga ima sakkortutigisoq, Naalakkersuisut uppitinneqartariaqarlutik, Jens Frederik Nielsen oqarpoq.Assi: KNR / Malik Brøns

Demokraatit nipisattassiissutinut suliaq pillugu: Isiginngitsuusaarnianngilagut

Demokraatit siulittaasuata, Jens Frederik Nielsenip Kukkunersiuinermut ataatsimiititaliap nipisattassiissutinut tunngatillugu suliamut nassuiaataa tusaatissatut tiguaa. Inatsisinik unioqqutitsisoqarsimasuuppat allatut nipeqassagaluartoq, siulittaasoq oqarpoq.

- Ataatsimiititaliap misissuinerata naammassinera inerniliussaalu tusaatissatut tiguagut. Aamma takusinnaavarput, sukumiisumik suliarisimagaat.

Demokraatit siulittaasuat, Jens Frederik Nielsen taama oqarpoq.

Nipisattassiissutinut suliaq pillugu naatsumik:

 

Nipisattassiissut siorna aalisarneqanngitsut 204 tonsit 2020-mut nuutsinnissaat Naalakkersuisut maajip ulluisa aqqaneq-aappaanni aalajangerpaat.


Kalaallit Nunaanni Aalisarnermut Nakkutilliisoqarfiup paasissutisiinera naapertorlugu ammaasseqqinneq politikkikkut aalajangerneruvoq.


Imartani Paamiut avannaaniit Kangerlussuaq tikillugu nipisanniarusuttunut nipisanniartoqarsinnaajunnaartoq, sapaatit akunneranni kingullermi nalunaarutigineqaraluarpoq.

 

IA: Kim attuumassuteqarpallaarpa?

Inuit Ataqatigiit suliaq pillugu avammut nalunaaruteqaqqaarput.


Kim Kielsen umiatsiaminik aalisartumut atukkiussereerluni Naalakkersuisuni nipisattassiissutinik qaffaaqataagami imminut iluaqutissinnersoq pillugu apeqquteqarniarlutik nalunaaruteqaramik taamaattoqarpoq.
 

Kim Kielsen Naalakkersuisut ataatsimiinnerannut peqataavoq, attuumassuseqarsinnaallunilu paasissutissiissutiginagu.

 

Naalakkersuisut eqqartuussissuserisumut suliakkiisut

Naalakkersuisullu siulittaasuata suliamut atatillugu isornartorsiorneqartorujussuanngorami suliamik naliliinissaq eqqartuussissuserisoqatigiinnut Poul Schmithikkunnut suliakkiutigaa. Kim Kielsenilu attuumassuteqarpallaarsimanngitsoq eqqartuussissuserisoqatigiit nalilerpaat.

 

Kim Kielsen nipisattassiissutinik qaffaaqataagami tamatumalu saniatigut umiatsiaminik aalisartumut attartortitsigami attuumassuteqarpallaanngilaq. Eqqartuussissuserisut suliffeqarfiat, Poul Schmidt taama inerniliuuteqarpoq.

 

Kukkunersiuinermut ataatsimiititaliaq sakkortuumik uparuaasoq

Inatsisartut Kukkunersiuinermut ataatsimiititaliaa tamatuma kingorna suliamut atatillugu nalunaajaanerminik tunniussaqarpoq.

 

Ataatsimiititaliallu matumani "sakkortuumik uparuaaneq" atorpaa pissutsillu "isornarluinnartutut" erseqqissaatigalugit.

 

- Ataatsimiititaliap sakkortuumik uparuaavoq Inatsisartullu Naalakkersuisut siulittaasuata suliami matumani attuumassuteqarpallaarnissamut apeqqut eqqumaffigisimanngikkaa malugeqqullugu.

 

Oqaaseqaatit taakku ataatsimiitaliap naliliinermi oqaaseqaataata allattorsimaffiani qaffasinnerpaamik sakkortunerpaamillu inissisimapput.

Suliaq Naalakkersuisut siulittaasuata, Kim Kielsenip nipisattassiissutinik qaffaanerup saniatigut umiatsiaminik aalisartumut attartortitsineranut tunngavoq

Tamatuma saniatigut Naalakkersuisut siulittaasuat attuumassuteqarpallaarnersoq attumassuteqarpallaannginnersorlu qujarutiginnittoqalerpoq, Kukkunersiuinermullu ataatsimiititaliaq tassunga atatillugu amerlasuunik apeqqusiivoq.

AAMMA ATUARUK Inuit Ataqatigiit ataatsimiititaliap nassuiaataa pillugu: Kinguneqartitsisoqassanersoq maanna takussavarput

Kukkunersiuinermut ataatsimiititaliap misissuineq qaammatini pingasuni naammassiniarsaraa.

Kukkunersiuinermut ataatsimiititaliap Naalakkersuisut ataatsimiititaliap paasissutissanik piumasaanik tunniussinngitsutut ilaatigut isornartorsiorpai.

Ataatsimiititaliattaaq ataatsimiititaliap uparuaassutigisinnaasaa isornartorsiuinermik oqaaseqarneq sakkortunerpaaq atorpaa - Naalakkersuisullu siulittaasuata suliami attuumassuteqarpallaarsinnaanermut apeqqut eqqumaffigisimanngikkaa Inatsisartunut maluginiaqqullugu.

Kukkunersiuinermut ataatsimiititaliap oqaatigisinnaasaani sakkortunerpaamik isornartorsiuineruvoq.

Naalakkersuisuisut uppisinnissaat naatsorsuutiginngikkaa

Demokraatilli Inatsisartut suliaq oqallisigippagu suliamut atatillugu kinguneqartitsisoqarnissaa ilimaginngilaat.

Jens Frederik Nielsenip Kukkunersiuinermut ataatsimiititaliap nalunaajaanerani paasissutissat aallaavigalugit Kim Kielsen attuumassuteqarpallaarsimanngitsutut nalilerpaa.

Inatsisartulli Kukkunersiuinermut ataatsimiititaliaata suliaqarnermini tamanna inerniliiffiginngilaat.

AAMMA ATUARUK Erik Jensen nipisattassiissutit pillugit: Naalakkersuisut ilungersunarput

- Kisianni una aalajangiinermi ingerlatseriaatsip sakkortuumik isornartorsiorneqarnera isumaqatigivarput. Taamaammat tusaatissatut tiguarput, sulilluarsimanerannullu qujalluta.

Isiginngitsuusaarnianngitsoq

Illuatungiliuttut partiianit Inuit Ataqatigiit siulittaasuat, Múte Borup Egede Demokraatinut aamma isornartorsiuingaatsiarpoq.

Taassumami naalakkersuisoqatigiit nipisattassanut suliamut atatillugu isiginngitsuusaaginnarnissaat naatsorsuutigalugu marlunngornermi oqaatigaa, uanilu Demokraatit naalakkersuisoqatigiinnut ilaaleramik inatsisartuni amerlanerussuteqalersitsisut eqqaallugit.

- Inuit Ataqatigiinninngaanniit ersarissumik oqartiartoreernikuuvugut, taamatut ingerlatsisoqarsinnaanngilaq. Isumaqarpunga, naalakkersuisoqatigiit (Siumut, Nunatta Qitornai Demokraatillu) ilaatigut Demokraatit siuttuliullugit isiginngitsuusaarluginaasiit ingerlariaqqissasut, Múte Borup Egedep oqarpoq.

Tamannali Jens Frederik Nielsenip illuatungilerpaa.

- Una pineqartoq, isumaqanngilanga ima sakkortutigisoq, Naalakkersuisut uppitinneqartariaqarlutik. Uanga siumut suliarpassuarnut maannakkut ingerlasunut isigerusunneruvunga, taavalu una ilikkarfigalugu.

AAMMA ATUARUK Eqqartuussissuserisoqarfik: Kielsen nipisattassanut suliamut attuumassuteqarpallaanngilaq

- Aamma oqaatigissavara: uagut suna tamaat akigalugu Naalakkersuisutut issianngilagut. Inatsisitigut unioqqutitsisoqarsimasoq inerniliunneqarsimasuuppat, taava allatut maannakkut qisuariassagaluarpugut.

Demokraatit Naalakkersuisunut piffissami sivitsortumi ikiorfartortaareerlutik maajip qaammataata naanerani Naalakkersuisooqataalerput.

Jens Frederik Nielsen inuussutissaqarnermut aatsitassaqarnermullu naalakkersuisunngorpoq, Steen Lynge nunanut allanut tunngasunut nukissiuuteqarnermullu naalakkersuisunngorpoq, Anna Wangenheimilu peqqissutimut naalakkersuisunngorluni.

Isummersuutit

inatsisartut-sal-sep2019.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat