Demokraatit naqinnernik ilisarinnissinnaanngitsut ukkatilerpaat
Aammattaaq Andap paaserusuppaa meeqqat qanoq amerlatigisut meeqqat atuarfiata qimannerani naqinnernik takunnissinnaannginnersut, imaluunniit atuarsinnaanermut allassinnaanermullu sanngiitsuusarnersut.
Taamatullu aamma paaserusullugu, Naalakkersuisut qanoq iliuuseqartarnersut qulakkeerumallugu naqinnernik takunnissinnaanngitsut, sapinngisamik siusinnerpaamik paasineqartarnissaat anguniarlugu, taamaaliornikkummi qulakkeerniarlugu atuartut pitsaanerpaamik ikiorseneqartarnissaat.
Naalakkersuisunut apeqqutit ilagaat, suliniutit suut aallartinniarneqarnersut innuttaasut naqinnernik takunnissinnaannginnertik pissutingalugu inuussutissarsiutigiligassaminnik ilinnialernissaminnut qanoq ikiorserniarneqarnersut, soorluttaaq paaserusukkaa inuaqatigiinni qassit naqinnernik takunnissinnaanngitsut imaluunniit atuarsinnaanermut allassinnaanermulluunniit sanngiiffeqartut qassiunersut, suliniutillu suut aallartisarniarneqarnersut innuttaasut taamaattut ikiorniarlugit.
- Meeqqat atuarfiat pillugu peqqussut naapertorlugu meeqqat atuarfianni atuartitsineq nikerartumik ingerlanneqartussaavoq atuartut ataasiakkaat pisariaqartitaannut piginnaasaannullu naleqqussarlugu.
Tamanna tunngavigalugu Demokraatini isumaqarpugut, pingaaruteqartoq meeqqat atuarsinnaanermut allassinnaanermullu ajornartorsiuteqartut immikkut atuartinneqarnissaannut imaluunniit allaanerusumik immikkut atuartinneqarnissaannut sapinngisamik siusinnerpaamik neqeroorfigineqartarnissaat taamaasiornikkut ikinngutimittulli allatulli kingorna ilinniarnissaminnut periarfissaat qaffassarumallugit, Anda Uldum §37 apeqqutimini tungavilersuutigalugu allappoq.
