Demokraatit: Napãtôk akisussaaffilerneqartariaqanngilaq
Jens Napãtôk ataatsimiititaliani taama pingaaruteqartigisuni akisussaaffilerneqartariaqanngitsoq, Demokraatit isumaqarput.
Jens Napaattuup angerlarsimaffiani videoliarineqartoq, inooqatiminut siorasaarisoq, kikkunnit tamanit takuneqarsinnaanngorlugu nittarsaanneqartoq kinguneqartinneqartariaqarsorineqarpoq.
Akerliani Naleqqap tamanna nammineq kinguneqartinniarnerlugu nalilersussagaa, Siumut isumaqarpoq.
AAMMA ATUARUK Video: Siumut Demokraatillu Inatsisartunit akerliullutik aninerat takuuk
- Tassa paasisinnaanngilarput pinikoq isiginngitsuusaarneqartoq, tusaanngitsuusaarneqartoq. Taamatullu inuk pineqartoq ataatsimiititaliani taama pingaartigisuni siulittaasunngortinneqartoq.
Demokraatit siulittaasuat, Jens Frederik Nielsen taama oqarpoq.
Videoliaq Jens Napaattuumut tunngasoq peqqutaalluni Inatsisartuni ataatsimiinneq ippassaq marlunngornermi pisarnermiit pisoqarfiuneruvoq, ilaatigut Siumut Demokraatillu Inatsisartut ataatsimiittarfianiit aniinnarput.
Videoliami inuit pingasut inimiittut takutinneqarput. Taakkunannga marluk tassaapput Jens Napaattooq taassumalu inooqataa. Napaattuup inooqataa natermi nalavoq, Napaattuullu sequtserniarlugu siorasaarpaa.
AAMMA ATUARUK Siumup Jens Napaattooq politiinut unnerluutigigaa
Demokraatit Inatsisartut ataatsimiittarfianiit aniinnarnerannit ilaatigut taanna peqqutaavoq.
- Arlalinnik peqquteqarpoq, siullermik inatsisartut siulittaasuat ataatsimiinneri aqutsisoq oqaaseqartitsinnginnera, taanna soorunami akerlilerparput. Kisianni aamma pisimasut ilisimalikkagut weekendimi pisimasut toqqammaviupput.
Naleraq nammineq nalilersuissaaq
Siumut siulittaasuata Erik Jensenip, pisoq ignerlaannaq politiinut tunniukkitsit uppernarsarpaa. Partiilli iluanni qanoq kinguneqartinneqassanersoq taanna isumerusunngilaq
- Nammineq taanna partiip kiisalu partiit susassaqartut nammineq aalajangissavaat qanoq kinguneqartitsissanerlutik. Uagut pisussaaffipput malillugu politiinut nalunaarutiginnippugut. Taavalu politiit inerniliussassaat uagut naalaassavarput.
- Kisianni qanoq pisoqarumaarnissaa, inernilersuereernissaq taanna mianersuuteqqissaarparput. Naatsorsuutigaarpulli partiit susassaqartut aammalu naalakkersuisooqatigiit arlaatigut tassunga nalilersueqqissaassasut, taamaalillutik ajunnginnerusumik aallartinnissaat qulakkeernissaanik aamma pisussaaffeqartussanngussapput.
