Demokraatit: Nangikkiartartut unitsittariaqarput
- Nangikkiartartut amerliartuinnarput, taamaalillutillu akorngusersuiffissarinngisaminni akorngusersuisarlutik. Tamanna eqqaamiuusunut ilaqutariinnullu meerartalinnut sunniuteqarnerluttarpoq. Taamaammat takorusupparput imerniartarfiit ammasarfii sivitsorneqarsinnaannginersut, taamaalilluni imertarfiutillit namminneq aalajangiisinnaanngorlugit ammasarfimminnut. Taama Justus Hansen Demokraatineersoq oqarpoq.
Taassuma Anda Uldumillu aammalumi Demokraatit Inatsisartuni ilaasortaatitaasa piffissami kingullermi eqqartortarsimavaat imigassamik atuinerup kinguneranik ajoqusersuisarnerit qanoq qaangerneqarsinnaanersut.
Ullumikkut imertarfiit ullaasakkut pingasunut matusarput, Demokraatilli aalajangiisinnaasuuppata tassa ammasarfiat allanngortinneqartariaqarpoq:
- Allannguutaasinnaasoq siulleq tassaasinnaavoq ammasarfiit tallimap imaluunniit arferngup tungaanut sivitsorneqarnerat. Tamatuma kingorna politiinut isumaginnittoqarfinnullu tusarniarneqarsinnaavoq allanngortitsineq qanoq sunniuteqarsimanersoq. Tassa sivisunerusumik ammatitsisalerneq angerlarsimaffinni perulluliortunik annikillisisitsimanersoq imaluunniit aqqusinerni perulluliortartut ikileriarsimanersut? Justus Hansen oqarpoq.
Demokraatimmi isumaqarput ullumikkut imerniartarfiit matujaartarnerisa kinguneranik ajornartorsiutit arlallit pilersinneqartartut:
- Soorunami inuit aalakoortut nuannisaarusuttullu ataatsikkut silamut anisinneqaraangamik ajornartorsiutinik malitseqartarpoq. Tamannalu sapaatip akunnerata naaneranik allatut atuerusuttunut sunniuteqarnerluttarpoq, Justus Hansen oqarpoq.
Imerniartarfiilli sivisunerusumik ammatinneqartalernissaat immiaaqqat akisunerulernerannik malitseqartariaqartoq Demokraatit isumaqarput:
- Sivisunerusumik ammasitsisalernissaq imerniartarfiutillit isertitaqarnerulernerannik malitseqartussaavoq, taamaammat takorloorneqarsinnaavoq immiaaqqat tunineqartut akitsuuserneqarsinnaanerat. Akitsuutigineqartorlu pitsaaliuinermi suliaqarnermut, paasisitsiniaanermut imerajuttunullu katsorsaanermut atorneqarsinnaavoq, Justus Hansen oqarpoq.
Taavami immiaaqqamut akitsuinissaq qanoq annertutigissava?
- Tassa koruunimiit fem koruunimut immiaaqqap akia qaffanneqarsinnaavoq, Justus Hansen oqarpoq.
Justus Hansenili isumaqanngilaq immiaaqqap akianik qaffaaneq, qaffaatillu pitsaaliuinermut atorneqarnerat Nunatsinni imigassamik ajornartorsiutinut aaqqiissutaasinnaassasut:
- Naamik, imigassamik ajornartorsiuteqarnernut qaangiissutaasinnaanngillat, kisianni qanoq iliuuseqarfiginissaanut iluaqutaasinnaapput, Justus Hansen oqarpoq.
